Երևանի նոր երթուղային ցանցում նախատեսվում է ունենալ 101 նոր տրոլեյբուս: Այս մասին վերջերս մեզ հետ զրույցում ասել էր Երևանի քաղաքապետի տեղակալ Հրաչյա Սարգսյանը։ Այսօր քաղաքը սպասարկում է տրոլեյբուսային 5 երթուղի: Օրական գիծ է դուրս գալիս միջին հաշվով 40 միավոր շարժակազմ: Ըստ քաղաքապետարանի՝ էլեկտրատրանսպորտից օրական օգտվում է 12000-14500 ուղևոր: Վերջին անգամ տրոլեյբուսների կայանը թարմացվել է 2008-ին: Ուղիղ 70 տարի է, ինչ տրոլեյբուսը Երևանի վերգետնյա էլեկտրատրանսպորտի մի մասն է։ Շարժակազմը, սակայն, շատ մաշված է, քաղաքի տարբեր հատվածներում կարելի է տեսնել վթարված տրոլեյբուսներ, որոնք անհարմարություն են պատճառում երթևեկությանը։ Ըստ փոխքաղաքապետի, սակայն, էկոլոգիապես մաքուր տրանսպորտային այս միջոցը զարգացման հեռանկար ունի:
«Ներկայումս տրոլեյբուսի ենթակայանները շատ մաշված են, պետությունից տարեկան 600 միլիոնի չափով գումար ենք ստանում տրոլեյբուսային համակարգը պահպանելու համար։ Հիմա տեսնում ենք, որ աշխարհը գնում է դեպի էլեկտրատրանսպորտի, այժմ կան էլեկտրաբուսներ, որոնք ամբողջությամբ աշխատում են էլեկտրաէներգիայով։ Հաշվի առնելով այն տենդենցը, որ աշխարհը հրաժարվում է վառելիքից, տրոլեյբուսները ավելի ակտուալ են դառնում»,- ժամանակ առաջ «Առաջին լրատվական»-ի հետ զրույցում ասել էր փոխքաղաքապետը՝ հավելելով, որ պարզապես պետք է բավականին ներդրում իրականացնել տրանսպորտային այս միջոցի զարգացման ուղղությամբ:
«Որոշակի հաշվարկ ենք կատարել, ըստ որի՝ 36 միլիոն եվրոյի կարգի գումար է պետք, որպեսզի ունենանք տրոլեյբուսի 10 երթուղի՝ իր բոլոր ենթակայաններով ու գծերը փոխելով։ Բայց քանի որ միանգամից հնարավոր չէ ամբողջ համակարգը փոխել, սկզբում երևի ձեռք կբերեք ավտոբուսներ, ապա տրոլեյբուսներն աստիճանաբար ձեռք կբերենք»,- ասել էր փոխքաղաքապետը։
Երևանի քաղաքապետի խոսնակ Հակոբ Կարապետյանն «Առաջին լրատվական»-ի հետ զրույցում, անդրադառնալով արդեն ժամկետներին, նշեց, որ ժամկետները նույնն են, ինչ ներկրվելիք ավտոբուսների դեպքում, քանի որ տրոլեյբուսների ներկրումը ևս տրանսպորտային ռեֆորմի մի մասն է։
Ինչ վերաբերում է տրանսպորտային ցանցի արդիականացման ժամկետներին, հիշեցնենք, որ քաղաքապետ Հայկ Մարությանն ասել էր, որ նախնական երկու տարի ժամանակ է պետք դրա համար։ Տրանսպորտային նոր ցանցի վերաբերյալ նախագիծը հաստատվելուց հետո պետք է մրցույթ հայտարարվի, ավտոբուս արտադրող ընկերությունները սկսեն արտադրել այդ քանակը, և իրականացվի տեղափոխումը։
Հիշեցնենք, որ Երևանի տրանսպորտային նոր ցանցի վերջնական նախագիծը մշակել է բրիտանական WYG խորհրդատվական ընկերությունը՝ դեռևս նախորդ իշխանությունների պատվերով։ Նախագիծը քաղաքային բյուջեի վրա 850 հազար դոլար էր արժեցել։ Նախնական 130-ից 150 միլիոն դոլար պահանջող ծրագրով նախատեսվում է գործող 111-ի փոխարեն 42 երթուղի՝ 845 ավտոբուս և 101 տրոլեյբուս: Ավտոբուսները կլինեն հարմարեցված քաղաքի համար, կլինեն 7.5-8, 12, 18 մետրանոց ավտոբուսներ, գործելու է միասնական երթուղային համակարգ, միասնական վճարային համակարգ։ Քաղաքային իշխանությունները տրանսպորտային ցանցի արդիականացումից հետո սակագնի թանկացումը չեն բացառում։
