Գերմանիայի կանցլեր Անգելա Մերկելը հայտարարել է, որ «Ուկրաինայի տարածքային ամբողջականության» հետ կապված իրադրության սրացման դեպքում Ռուսաստանի դեմ կարող են տնտեսական նոր պատժամիջոցներ կիրառվել, հայտնում է France Presse գործակալությունը:
Շաբաթ օրը ելույթ ունենալով Քրիստոնեա-դեմոկրատական միության հանդիպմանը, Մերկելը նշել է, որ Ուկրաինայի ճգնաժամի վերաբերյալ եվրոպական գործընկերները տարբեր դիրքորոշումներ ունեն: Միաժամանակ, Մերկելը հայտարարել է, որ ԵՄ երկրները պատրաստ են Ռուսաստանի դեմ ընդհանուր գործողությունների:
Կանցլերի խոսքերով՝ բարձրացնելով գազի գինը՝ Մոսկվան Կիևի նկատմամբ տնտեսական ճնշումներ է գործադրում: Ընդ որում՝ Մերկելը նշել է, որ «ոչ ոք չի ցանկանում Ռուսաստանի հետ դադարեցնել իրավիճակի քննարկումը»:
