«Ռուսաստանի միջամտությունը բխում է միայն ու միայն Ռուսաստանի շահերի տեսանկյունից, և պետք է զարմանայինք, եթե դա տեղի չունենար՝ հաշվի առնելով այն սահմանները, որոնք հիմա կան: Ռուսաստանն ավելի շահագրգռված է Իրանին տեսնելու որպես բարիդրացիական հարաբերություններ ունեցող պետություն, քան Ֆրանսիային և ԱՄՆ-ին»,- լրագրողների հետ հանդիպման ժամանակ անդրադառնալով Ռուսաստանի ակտիվությանը ԼՂ հարցում՝ կարծիք հայտնեց ԱԺ «Ժառանգություն» խմբակցության անդամ Լարիսա Ալավերդյանը:
Ալավերդյանը նկատեց, որ Միացյալ Նահանգներն ու Ֆրանսիան այսօր շատ են հնչեցնում Թուրքիայի մասնակցության հարցը և միամտություն ցուցաբերում՝ կարծելով, թե ԼՂ հարցը լուծում կգտնի և հայ-թուրքական սահմանը կբացվի. «Դա այնպիսի կոպիտ միջամտություն է ու դիվանագիտական прокол, որը վերջին տարիների ընթացքում այլ պետությունների հանդեպ տեղի չի ունեցել»:
«Ժառանգական» պատգամավորի կարծիքով, այս ամենը հաշվի առնելով՝ Ռուսաստանը ոչ միայն հապճեպ, այլ վաղուց արդեն այս հարցում պետք է հստակ մոտեցում ունենար. «Որ չընկնի Կազանից հետո մտածի, թե հիմա ի՞նչ անի՝ ի՞նչ համեմունք գցի, թե՞ սկսի նոր ճաշ եփել»:
Ալավերդյանի գնահատմամբ՝ Ռուսաստանի կեցվածքը թույլ է եղել թե՛ Կազանում, թե՛ Կազանից հետո. «Բայց որ ավելի ու ավելի ուժեղացնելու է իր միջամտությունը՝ համոզված եմ»:
Մինսկի խմբի ֆորմատի փոփոխության մասին դիտարկումներին անդրադառնալով՝ Լարիսա Ալավերդյանը նշեց, որ այդ ֆորմատի փոփոխություն կոչվածը հիմա փորձում է անել Եվրամիությունը:
