Իրանի նախագահ Հասան Ռոհանին Եվրասիական տնտեսական միության հետ ազատ առևտրի գոտու ստեղծման ժամանակավոր հանաձայնագրի մասին կարգադրությունն ուղարկել է պրոֆիլային գերատեսչություն՝ տեղեկացնում է RIA Novosti-ն։
Ռոհանին համապատասխան օրենքն ուղարկել է Իրանի արդյունաբերության և առևտրի նախարարություն՝ ի կատարումն։
Հունիսի սկզբին Իրանի խորհրդարանը վավերացրել է ԵՏՄ-ի հետ ԱԱԳ ստեղծման մասին համաձայնագիրը։
ԵՏՄ երկրները և Իրանը ստորագրել են ժամանակավոր համաձայնագիր ազատ առևտրի գոտի ստեղծելու մասին 2018 թվականի մայիսի 17-ին Աստանայի տնտեսական համաժողովի ընթացքում։ Այն հաշվարկված է երեք տարով և նախատեսում է ԱԱԳ ձևավորում ԵՏՄ-ի և Իրանի միջև սահմանափակ ապրանքատեսակների համար։ Ռուսաստանը համաձայնագիրը վավերացրել է 2018-ի նոյեմբերին։
Համաձայնագրի պայմաններով՝ ոչ ուշ, քան դրա ուժի մեջ մտնելուց մեկ տարի հետո կողմերը պարտավորվում են բանակցություններ սկսել ազատ առևտրի մասին լիարժեք համաձայնագրի կնքման համար։ Համաձայնագրի իրականացումը կնպաստի նրա մասնակիցների միջև առևտրի ծավալի ավելացմանը և տնտեսական կապերի զարգացմանը, Իրան ռուսական արդյունաբերական և գյուղատնտեսական արտադրանքի մատակարարումների ավելացմանը։
Փաստաթուղթը ձևավորում է ԵՏՄ-ի և Իրանի միջև առևտրի հիմնական կանոնները, որոնք առավելագույնս մոտեցվելու են ԱՀԿ կանոններին, ինչպես նաև ընդգրկում է առավել բարենպաստ ռեժիմի և ազգային ռեժիմի, պաշտպանական միջոցների և մաքսային վարչարարության հարցերը։
