Ռուսաստանն այլ գործընկերներ կգտնի ԱՄՆ-ի ու ԵՄ-ի կողմից հնարավոր տնտեսական պատժամիջոցների դեպքում՝ հայտարարել է Ռուսաստանի նախագահի մամլո քարտողար Դմիտրի Պեսկովը:
«Աշխարհը միաբևեռ չէ, մենք կկենտրոնանանք այլ տնտեսական գործընկերների վրա»,- ասել է Պեսկովը՝ փոխանցում է RIA Novosti-ն:
Նրա խոսքով՝ ԱՄՆ-ի ու ԵՄ-ի հնարավոր տնտեսական պատժամիջոցները Ռուսաստանի դեմ անընդունելի են, և Ռուսաստանը հետագայում էլ մտադիր է ԵՄ-ին տնտեսական համագործակցություն առաջարկել:
«Մենք ցանկանում ենք ԵՄ-ի ու ԱՄՆ-ի հետ լավ հարաբերությունների մեջ մնալ՝ հատկապես ԵՄ-ի հետ, քանի որ ԵՄ-ն Ռուսաստանի հիմնական տնտեսական, ներդրումային և առևտրային գործընկերն է: Մեր փոխադարձ տնտեսական կախվածությունը ենթադրում է, որ մենք պետք է պահպանենք լավ հարաբերությունները»,- հայտարարել է նախագահի մամլո քարտուղարը: Նա նաև ընդգծել է, որ առանց Ռուսաստանի մասնակցության գլոբալ տնտեսական խնդիրների քննարկումը չի կարող լինել լիարժեք:
