Աշխատավարձի բարձրացումը շատ դրական է ոչ միայն դատական ոլորտում, այլ ընդհանրապես բլոր ոլորտներում: Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Արթուր Դավթյանը՝ անդրադառնալով ՀՀ վարչապետ Նիկոլ Փաշինյանի հայտարարությանը, ըստ որի՝ քանի դեռ դատավորների աշխատավարձը 5-6 անգամ չի բարձրացել, անկախ դատական համակարգ չի կարող լինել:
«Իսկ դատական ոլորտում աշխատավարձի բարձրացումը այնքանով է լավ, որ իրականում շատ ծանր և պատասխանատու աշխատանք է դատավորի աշխատանքը: Դուք ինքներդ լսեցիք, որ ասաց՝ «նեդոբոռ» է եղել: Այսինքն ցանկացողներ, որոնք կցանկանային մասնակցել քննություններին և հետագայում դատավոր կաշխատեին, ավելի քիչ է եղել, քան այդ հնարավորությունը եղել է»,-ասաց պատգամավորը:
Նա ողջունելի համարեց, որ դատավորների աշխատավարձը բարձրացվի. «Դա պետք է ճիշտ ժամանակին իրականացնել, երբ կունենանք վեթինգ անցած դատական համակարգ: Երբ դատավորը կանցնի վեթինգ, ավելի պատվաբեր կլինի նրա աշխատանքը, իրենց ավելի գնահատված կզգան դատավորները և աշխատավարձի բարձրացմամբ կոռուպցիան ընդհանրապես կվերանա դատական համակարգում»,-ընդգծեց պատգամավորը:
