1999 թվականից «Հեյֆեր փրոջեքթ ինթերնեյշնլ» հայաստանյան գրասենյակն օգնում է գյուղացիներին փոքր տնտեսություններ հիմնել, բարելավել նրանց սոցիալ-տնտեսական վիճակը: 15 տարվա ընթացքում գրասենյակի աջակցությունից օգտվել է 10 հազար ընտանիք: Այսօր տեղի ունեցած մամուլի ասուլիսի ժամանակ այս մասին ասաց «Հեյֆեր փրոջեքթ ինթերնեյշնլի» հայաստանյան գրասենյակի տնօրեն Անահիտ Ղազանչյանը՝ հավելելով, որ այս պահին 60 ֆերմերային կոոպերատիվներ իրենց կողմից տրակտորներ և սերմացու են ստանում:
«Վերջին 3 տարիների ընթացքում, սակայն, եկանք այն եզրակացության, որ մեր գործողությունների մի մասը պետք է ուղղենք գյուղական տուրիզմի զարգացմանը: Հայաստանը շատ փոքր երկիր է, և պետք է անել ամեն բան, որպեսզի տարածաշրջանային ծրագրերում նրա ներգրավվածությունը հասնի առավելագույնի: Մանավանդ որ Հայաստանի բրենդինգը գնալով ավելի շոշափելի է դառնում»,- ասաց նա:
«Նորարարական գյուղական զբոսաշրջության խթանում սևծովյան տարածաշրջանում» ծրագրի համակարգող Աննա Առաքելյանն էլ նկատեց, որ մեր երկիրը գյուղական տուրիզմի տեսանկյունից այսօր բավական մրցունակ է: «Ուսումնասիրությունները ցույց են տալիս, որ Հայաստանն այս բնագավառում կարող է համեմատվել այնպիսի երկրների հետ, ինչպիսիք են Լեհաստանն ու Չեռնոգորիան»,- ասաց նա՝ հավելելով, որ Հայաստանից բացի, «Նորարարական գյուղական զբոսաշրջության խթանում սևծովյան տարածաշրջանում» ծրագրի մասնակից երկրներ են Վրաստանը, Թուրքիան և Բուլղարիան:
Նշենք, որ ծրագիրը համաֆինանսավորվում է ԵՄ-ի կողմից՝ մոտ 480 հազար եվրոյի շրջանակներում: Ծրագիրը սկսվել է 2013 թվականի նոյեմբերին և կտևի 18 ամիս:
Ծրագիրը բաղկացած է 3 բաղադրիչից՝ գյուղական վայրերում հյուրընկալությանն առնչվող բիզնես ծավալելու զարգացումներ, զբոսաշրջության ոլորտում նորարարական արտադրանքի՝ «տարածաշրջանային այցելուի միասնական փաթեթի» մշակում և երկրների կապերի համակարգում միջկառավարական մակարդակով:
