Ադրբեջանի ծանր հանցագործությունների դատարանը 2018-ի հուլիսի 15-ին գերեվարված ՀՀ քաղաքացի, Տավուշի Բերդավան գյուղի բնակիչ Կարեն Արմենի Ղազարյանին դատապարտել է 20 տարվա ազատազրկման «Ադրբեջանում ահաբեկչական գործողության փորձի համար»։ ՀՀ մարդու իրավունքների նախկին պաշտպան, «Ընդդեմ իրավական կամայականությունների» ՀԿ գործադիր տնօրեն Լարիսա Ալավերդյանը «Առաջին լրատվական»-ի հետ զրույցում նշեց, որ ՄԻՊ-ն արդեն գործընթաց է սկսել մարդու իրավունքների պաշտպանի միջազգային ինստիտուտի մակարդակով։
«Ես կոչ եմ անում մեր պետական մարմիններին սկսել այլ պետությունների հետ միջնորդավորած, արդեն դատապարտված Կարեն Ղազարյանի տեղափոխումը Հայաստան։ Այն, ինչ Ադրբեջանը չի ուզում պահանջել Արցախից, որովհետև Արցախը չճանաչված է, նա պահանջում է Հայաստանից, ընդ որում գիտենք՝ ինչի համար։ Հայաստանն ունի ամբողջ իրավունքը և մինչև անգամ պարտավոր է սկսել դատապարտյալին տեղափոխման գործընթացը այն պետության, որի քաղաքացին է ինքը։ Դա կարող է լինել և՛ Ռուսաստանի միջոցով, և՛ ԱՄՆ-ի, և՛ Ֆրանսիայի, և՛ ՄԱԿ-ի որևէ ինստիտուտի միջոցով։
Ըստ Մարդու իրավունքների նախկին պաշտպանի՝ արդարադատության նախարարությունը և գլխավոր դատախազությունը հենց այսօր պետք է քայլեր նախաձեռնեն։
«Այս ամենը ամբողջովին կեղտոտ թելերով կարված գործ է և հստակ հետապնդում է մեկ նպատակ՝ քանի որ այսօր Սումգայիթի ջարդերի օրն է, իրենք դա որպես ծիսակատարություն են անում այդ դատավճռով, և օրը պատահական չէ ընտրված։ Իհարկե, գործողությունները պետք է տեղի ունենային, բայց այս ցինիզմը և ծիսակատարությունը շատ բանի մասին են խոսում, նախ այն, որ Ադրբեջանը խախտում է միջազգային հումանիտար իրավունքի նորմերը, բացի դրանից՝ նա հակադրվում է նրանց ցուցադրաբար, և շատ կարևոր է, որ Հայաստանը կարողանա այս հարցերը պատշաճ մակարդակի վրա բարձրացնել»,- նշեց Լարիսա Ալավերդյանը։
Նրա դիտարկմամբ՝ նախ ԵԱՀԿ Մինսկի խումբը պետք է այդ մասին խոսի, միջազգային նորմը ոչ միայն թույլ է տալիս, այլ նաև հորդորում է, որ տեղափոխեն, ինչպես դա թույլ էր տալիս Ռամիլ Սաֆարովի դեպքում՝ Հունգարիայից Ադրբեջան տեղափոխել։
«Հորդորում եմ, որ հենց վաղվանից մեր պատկան մարմինները այս հարցով զբաղվեն, նրանք պարտավոր են դա անել, և սա ոչ միայն հավանական է, այլ սա ճանապարհ է, որը դժվար է մերժել»,- հավելեց նա։
