Եգիպտոսի պաշտոնանկ արված նախագահ Մուհամմադ Մուրսին երեքշաբթի օրը դատարանի առջև կկանգնի: Այս անգամ դատական գործընթացը կառնչվի պետության նախկին ղեկավարի՝ 2011-ին բանտից փախուստին: Այս մասին հաղորդում է Ria Novosti-ն:
Հետաքննության տվյալներով՝ Մուրսին մասնակցել է Վադի ան-Նաթրուն բանտում տեղի ունեցած անկարգություններին, որտեղ նա պահվում էր 2011-ի իրադարձությունների ժամանակ, և որտեղից փախել է իր կողմնակիցների հետ: Դատախազությունը հայտարարում է, որ ապացույցներ ունի առ այն, որ փախուստը կազմակերպվել է պաղեստինյան իսլամիստական ՀԱՄԱՍ շարժման օգնությամբ:
Բացի այդ, պետական մեղադրողի կարծիքով՝ այդ շարժումը մասնակից է եղել 2011-ի հունվար-փետրվար ամիսներին ոստիկանական տեղամասերի վրա հարձակմանը, բանտերի վրա գրոհներին և հրդեհներին:
Սպասվում է, որ Մուրսիի հետ դատարանի առջև կկանգնեն նաև փախուստի գործով ևս 130 մեղադրյալներ՝ ներառյալ ՀԱՄԱՍ խմբավորման 70 ներկայացուցիչներ:
