Հոկտեմբերի 31-ին տեղի ունեցավ հանդիպում ՀՀ բնապահպանության նախարարության, Ռուսաստանի ՄԱԿ-ի զարգացման ծրագրի (ՄԱԶԾ) թրասթային հիմնադրամի ղեկավար կոմիտեի և ՄԱԶԾ հայաստանյան գրասենյակի ներկայացուցիչների միջև, որի ընթացքում ՀՀ բնապահպանության նախարարությունը և ՄԱԶԾ հայաստանյան գրասենյակը ստորագրեցին համաձայնագիր: Մեկնարկեց ծրագրի տեխնիկական վերազինման բաղադրիչը, և Բնապահպանության նախարարությանը փոխանցվեց ծրագրի շրջանակում ձեռք բերված հրշեջ մեքենաների առաջին խմբաքանակը, որոնք նախատեսված են անտառային և դաշտային հրդեհների դեմ պայքարի համար: Տեղի ունեցավ մեքենաների հանձնման արարողությունը:
ՀՀ բնապահպանության նախարարի պաշտոնակատար Էրիկ Գրիգորյանը նշեց. «Այս ծրագիրը կարևոր է նրանով, որ անմիջական առարկայական աշխատանքներ են իրականացվելու: Պատահական չէ, որ ծրագրի մեկնարկից մինչև այսօր հրաշալի աշխատանքային պայմաններ են ստեղծվել նախարարության և ծրագիրն իրականացնող թիմի միջև: Կարծում եմ, կլիմայական փոփոխությունների գործում Հայաստանի և Ռուսաստանի միջև համագործակցության շատ լայն ճանապարհ ունենք անցնելու»:
Հանդիպմանը քննարկվեցին ընթացիկ համագործակցության հետ կապված հարցեր, մասնավորապես, Ռուսաստանի կողմից ֆինանսավորվող «Հայաստանում կլիմայի փոփոխության ազդեցության մեղմումն անտառային և դաշտային հրդեհների կառավարման ներուժի զարգացման միջոցով» ծրագրի իրականացումը:
Ռուսաստան-ՄԱԶԾ թրասթային հիմնադրամի ղեկավար կոմիտեի ներկայացուցիչ Սերգեյ Կոնոնուչենկոն և Հայաստանում ՄԱԶԾ մշտական ներկայացուցչի տեղակալ Դմիտրի Մարիյասինը Էրիկ Գրիգորյանի հետ քննարկեցին ծրագրի իրականացման ընթացքը, կարևորեցին այն Հայաստանի հարուստ կենսաբազմազանության պահպանման տեսակետից, որի համար անտառային և դաշտային հրդեհները հիմնական վտանգների թվում են:
Ծրագիրը մեկնարկել է 2017 թ. սեպտեմբերին և օգնում է կլիմայի փոփոխության պայմաններում անտառային և դաշտային հրդեհների ռիսկերի նվազեցմանը և դրանց դեմ արդյուննավետ պայքարին:
