ԱՄՆ-ում հայտարարվել են 2014թ. «Ժողովրդական ընտրություն» (People’s Choice) մրցանակի արժանացած դերասանների անունները: Այս տարի «ժողովրդական» սիրելիներ են դարձելՍանդրա Բալոքն ու Ջոնի Դեպը:
People’s Choice-ը ԱՄՆ-ում միակ մրցանակն է, որի հաղթողները որոշվում են համաժողովրդական քվեարկության արդյունքով:
Հաղթողների անունները հայտնել են երեկ երեկոյան՝ Լոս Անջելեսի Nokia համերգասրահում կայացած հանդիսավոր արարողության ժամանակ:
Հանդիսատեսի կարծիքով՝ տարվա լավագույն դերասանուհին Սանդրա Բալոքն է: Նա համաժողովրդական քվեարկության արդյունքում ճանաչվել է նաև «Լավագույն կատակերգու դերասանուհի» և «Լավագույն դրամատիկական դերասանուհի» անվանակարգերի հաղթող:
Բալոքն արժանացել է նաև մրցանակի «Լավագույն կինոդուետ» անվանակարգում՝ «Ձգողականություն» ֆիլմում դերակատարման համար, որտեղ նրա խաղընկերը Ջորջ Քլունին էր:
Այս տարվա «Սիրելի կինոդերասանը» Ջոնի Դեպն է՝ այս անվանակարգում առաջ անցնելով Հյու Ջեքմանից, Չենինգ Տատումից, Լեոնարդո դի Կապրիոյից ու Ռոբերտ Դաունի Կրտսերից:
Ըստ հանդիսատեսի՝ տարվա լավագույն ֆիլմը «Երկաթե մարդը-3» ֆիլմն է, լավագույն երաժշտական ալբոմը՝ Ջասթին Թիմբերլեյքի The 20/20 Experience-ը:
«Ժողովրդական ընտրություն» մրցանակը շնորհվում է 1975-ից:
