ՀՀ տրանսպորտի, կապի և տեղեկատվական տեխնոլոգիաների նախարարությունը ՀՅԴ բյուրոյի տնտեսական հետազոտությունների գրասենյակին առաջարկում է ներգրավվել «Հյուսիս-հարավ» ծրագրին առնչվող գործընթացներում:
Այս մասին ասված է ՀՀ տրանսպորտի, կապի և տեղեկատվական տեխնոլոգիաների նախարարության` ՀՅԴ բյուրոյի տնտեսական հետազոտությունների գրասենյակի բաց նամակի պատասխանում, որը տարածել է նախարարության լրատվական ծառայությունը: Հաղորդագրությունը ներկայացնում ենք ամբողջությամբ.
«Հյուսիս-հարավ ճանապարհային միջանցքի ներդրումային ծրագիրը», լինելով ՀՀ խոշորագույն ռազմավարական ծրագրերից մեկը, ՀՀ ղեկավարության և հանրության ուշադրության կենտրոնում է: Ցանկացած մասնագիտական և փորձագիտական ուսումնասիրություն ծրագրի պատասխանատուների կողմից խրախուսվում է։
ՀՀ տրանսպորտի, կապի և տեղեկատվական տեխնոլոգիաների նախարարության, «Տրանսպորտային ծրագրերի իրականացման կազմակերպություն» ՊՈԱԿ-ի և ՀՅԴ բյուրոյի տնտեսական հետազոտությունների գրասենյակի ներկայացուցիչների միջև մինչ այս արդեն տեղի է ունեցել հանդիպում, որի ընթացքում հանգամանալից պարզաբանումներ են տրվել նրանց կողմից հրապարակայնորեն բարձրացված յուրաքանչյուր հարցադրման վերաբերյալ։ Բացի այդ, նախարարությունը պատրաստակամություն է հայտնել լայն համագործակցության՝ ծրագրի վերաբերյալ նրանց տրամադրելու ցանկացած փաստաթուղթ (բացառությամբ, եթե դրանց տրամադրումը և/կամ հրապարակումը օրենքով կամ պայմանագրերով սահմանափակված չեն)։
Մեկ անգամ ևս ընդգծում ենք, որ ծրագրի պատասխանատուները շահագրգիռ են, որպեսզի «Հյուսիս-հարավ ճանապարհային միջանցքի ներդրումային ծրագրի» հետ կապված ցանկացած հարց պատշաճ պարզաբանված լինի ինչպես հետազոտական գրասենյակի, այնպես էլ հանրության համար։
Ի դեպ, հանրության հետ սերտ համագործակցության պատրաստակամության մասին հուլիսի 18-ին լրագրողների հետ կայացած հանդիպման ընթացքում հայտնել է նաև ՀՀ տրանսպորտի, կապի և տեղեկատվական տեխնոլոգիաների նախարար Աշոտ Հակոբյանը։ Նախարարը խոսել էր հանրային հարթակ ստեղծելու մտադրության մասին, որտեղ ներգրավված անձինք կմասնակցեն այն գործընթացներին, որոնք տեղի են ունենում նախարարության աշխատանքների շրջանակներում։
ՀՅԴ բյուրոյի տնտեսական հետազոտությունների գրասենյակի ներկայացուցիչներին ևս առաջարկում ենք ներգրավվել նախարարին կից ձևավորվելիք հարթակում, մասնակից դառնալ նախարարության, այդ թվում՝ «Հյուսիս-հարավ» ծրագրին առնչվող գործընթացներին։
Տեղեկացնենք նաև, որ ՀՅԴ բյուրոյի տնտեսական հետազոտությունների գրասենյակի պահանջած տվյալների մի մասը տեղադրված է «Տրանսպորտային ծրագրերի իրականացման կազմակերպություն» ՊՈԱԿ-ի պաշտոնական կայքում»,- ասված է ՀՀ տրանսպորտի, կապի և տեղեկատվական տեխնոլոգիաների նախարարության լրատվական ծառայության տարածած հաղորդագրությունում:
