Ամեն տարի ՄԱԿ-ի նախաձեռնությամբ դեկտեմբերի 9-ը նշվում է որպես Կոռուպցիայի դեմ պայքարի միջազգային օր (International Anti-Corruption Day):
2003թ. այդ օրը Մեքսիկայի Մերիդա քաղաքում բարձր մակարդակի քաղաքական համաժողովին ստորագրվել է ՄԱԿ կոնվենցիա՝ ընդդեմ կոռուպցիայի:
Այդ միջազգային պայմանագիրը նախատեսում է միջոցներ՝ կոռուպցիայի նախազգուշացման, մեղավորներին պատժելու, ինչպես նաև կոռուպցիայի դեմ պայքարում միջազգային համագործակցության մեխանիզմներ: Այն անդամ պետություններին պարտավորեցնում է անցկացնել հակակոռուպցիոն քաղաքականություն, ստեղծել հատուկ մարմիններ կոռուպցիոն երևույթների դեմ պայքարելու համար:
Կոնվենցիան ուժի մեջ է մտել 2005թ. դեկտեմբերին: Կոռուպցիայի դեմ ՄԱԿ կոնվենցիայի և կոռուպցիայի համար քրեական պատասխանատվության Եվրոպայի խորհրդի կոնվենցիայի համաձայն՝ կոռուպցիան պետական իշխանությունը չարաշահելն է՝ անձնական շահ ստանալու համար, ինչպես նաև անձնական օգտագործման նպատակով հասարակական միջոցների անօրինական յուրացման բազմաթիվ ձևերը:
Կոռուպցիան բարդ սոցիալական, քաղաքական և տնտեսական երևույթ է, այն քայքայում է ժողովրդավարական ինստիտուտները, դանդաղեցնում տնտեսական զարգացումը:
