Մի քանի օրից կայանալու է Սյունիքի նախկին մարզպետ Սուրիկ Խաչատրյանի և Գորիսի նախկին քաղաքապետ Սամվել Հարությունյանի գործով հերթական դատական նիստը: Հիշեցնենք, որ Բուդաղյանների դեպքից հետո Սամվել Հարությունյանը բազմաթիվ բացահայտումներ արեց Սուրիկ Խաչատրյանի հետ կապված, որոնցից երկուսը Սյունիքի նախկին մարզպետը դիտել էր որպես վիրավորանք և զրպարտություն՝ փորձելով պատիվն ու արժանապատվությունը վերականգնել դատական եղանակով:
Սամվել Հարությունյանը, սակայն, զարմանում է, որ մինչև հիմա իրավապահները որևէ գործողություն չեն ձեռնարկել իր հայտարարությունների վերաբերյալ և չեն պատժել Սուրիկ Խաչատրյանին: «Լիսկայի նմանները, բնականաբար, ռեժիմի պարագլխի կողմից ոչ միայն պատասխանատվության չեն ենթարկվում, այլ բոլոր նպաստավոր պայմանները ստեղծում են նրա բարգավաճման համար: Միայն ես նրա կողմից կատարված տասնյակ հանցագործությունների մասին եմ բարձրաձայնել, բայց իրավապահ մարմինները որևէ քայլ չեն ձեռնարկել: Հայաստանի իրավապահ համակարգի ղեկավարները Լիսկայի, ու նրա նմանների նկատմամբ քայլ կարող են կատարել միայն այն դեպքում, երբ իրենց հանձնարարություն տրվի այս ռեժիմի պարագլուխ Սերժ Սարգսյանի կողմից: Բայց նա էլ չի տալիս այդ հանձնարարությունը»,- «Առաջին լրատվական»-ի հետ զրույցում ասաց Սամվել Հարությունյանը:
Նրա խոսքով` հաստատ չէ, որ Սուրիկ Խաչատրյանը սկսել է ակտիվ հանքարդյունաբերության բիզնեսով զբաղվել, ինչի մասին գրում է մամուլը: Ըստ Հարությունյանի` Խաչատրյանն ավելի հակված է վաճառել իր հանքերը, ինչպես վարվեց անցած տարի՝ հանքերից մեկը հսկայական գնով վաճառելով Քաջարանի պղնձամոլիբդենային կոմբինատին: «Չնայած նա ամեն ինչ անելու է, որ ոչ միայն իր ունեցածը պահի, այլև ավելացնի, էլ ավելիին հասնի: Վերջիվերջո, իր և իր նմանների գործելաոճը մեզ հայտնի է: Նրանք չեն հագենում: Իրենց կարգախոսն այն է, որ ախորժակը ուտելիս է բացվում»:
Հարությունյանի խոսքով, սակայն, ինքը բնավ չի զարմանա, եթե Խաչատրյանը վերջին աղմուկից հետո և առհասարակ սկսի ակտիվ բիզնեսով զբաղվել, որովհետև «Լիսկան այս բիրտ ռեժիմի կարկառուն ներկայացուցիչն է եղել, հենասյուներից մեկն է եղել», և նրա նմաններին ռեժիմի պարագլուխները սովորաբար խրախուսում են:
