«Ազգային հերոս Վազգեն Սարգսյանի անվան փողոցը անվանափոխելը տիկին Զառայի նոր զառանցանքն է: Որևէ առաջարկ քննարկելու համար պետք է նախևառաջ հասկանալ, թե դա ով և ինչ նպատակով է անում»,- անդրադառնալով Վազգեն Սարգսյանի փողոցի՝ Հանրապետության հրապարակի Հակոբ Պարոնյանի անվան երաժշտական կոմեդիայի պետական թատրոնից դեպի ՀՀ արտաքին գործերի և ՀՀ արդարադատության նախարարություններ տանող հատվածը Վուդրո Վիլսոնի անվամբ անվանակոչելու «Երկիր ծիրանի» խմբակցության առաջարկին՝ հայտարարեց Երևանի ավագանու ՀՀԿ խմբակցության անդամ Գրիգոր Մինասյանը:
Նա ներկայացրեց մի քանի դրվագներ, որոնք, նրա խոսքով, ցույց են տալիս, որ այս առաջարկի հեղինակները պատրաստ են ֆեյսբուքյան 100 լայքի համար 100 երես փոխել. «Ցնդաբանությունը հասավ այն աստիճանի, որ Փոստանջյանը «Ազատության» եթերում հայտարարեց, որ փաստաբան Տիգրան Եգորյանն է մեղավոր Հաց բերողի մահվան մեջ, ինչին ի պատասխան Եգորյանի կինն ասաց, որ Փոստանջյանի որոշ տեղերը մրմռում են, քանի որ ժամանակին իրեն չեն թողել անդամակցել դիտորդական կազմակերպությանը»:
Մինասյանի խոսքով՝ երբ «Երկիր ծիրանի»-ին պետք է իրենց կշիռն ավելացնել, նրանք քսմսվում են «Սասնա ծռերի»-ին, իսկ երբ պետք է հանուն նեղ անձնական շահերի ինչ-որ գործողություններ իրականացնել, պատրաստ են թիկունքից հարված հասցնել օրվա կռիվ տվող իրավապաշտպաններին:
Մինասյանը, անդրադառնալով քաղաքապետարանի կողմից Ամանորի հետ կապված ծախսերին առնչվող «Երկիր ծիրանի»-ի քննադատությանը, ասաց. «Անցած շաբաթ մեծ բիզնես կենտրոնում՝ շամպայններով ու առատ հյուրասիրությամբ, նշում էին իրենց չեղած կուսակցության մեկամյակը. բա էդ միջոցառման փողը ուղղեիք անապահով երեխաներին»:
Ինչպես նշեց Գրիգոր Մինասյանը, «Երկիր ծիրանի»-ն տարբեր նամակներով վարկաբեկում է քաղաքի միջազգային վարկանիշը. «Սրանից հետո մնում է միայն Ալիևին հրավիրել Երևան թեյ խմելու, որպեսզի մեկ-երկու տեսախցիկի արժանանան»:
Նրա խոսքով՝ այս խմբակն ասես դուրս է եկել «Ծիրանի հատիկ» զզվելի մի սերիալից:
«Նրանք փորձել են Վուդրո Վիլսոնով սիրաշահել ԱՄՆ-ին, բայց նույնիսկ դա նորմալ չեն արել, քանի որ կարող էին ավելի իրատեսական առաջարկներով հարգել այդ մեծանուն գործչի հիշատակը»,- հայտարարեց Գրիգոր Մինասյանը:
Մանրամասները՝ տեսանյութում:
