«Որոշ պատգամավորներ սեփական դրամական միջոցները գույք չեն հայտարարագրում, փոխարենը նրանց հարազատները մեծ գույք ունեն հայտարարագրած», այսօր «Մեդիա կենտրոնում» կազմակերպված քննարկման ժամանակ այս մասին ասաց փորձագետ Բաբկեն Թունյանը՝ անդրադառնալով 6-րդ գումարման խորհրդարանի 1-ին և 2-րդ նստաշրջանների մոնիտորինգին։
Ըստ փորձագետի, տվյալ զեկույցը կազմելու ժամանակ հայտարարագրեր չեն լրացրել 4 պատգամավոր՝ Արտաշես Գեղամյանը, Շուշան Պետրոոսյանը, Արման Սահակյանը և Արարատ Զուրաբյանը։ Բոլոր պատգամավորները, ովքեր լրացրել են հայտարարագրերը, մայիսի 18-ի դրությամբ՝ պաշտոնը ստանձնելու օրվանից, հատարարագրել են 7 մլրդ 431 մլն դրամ, 35,9 մլն դոլար, 10,5 մլն ռուբլի, 7,5 հազար շվեյցարական ֆրանկ, այսինքն՝ ընդհանուր 61 մլն դոլար։
«Եթե համեմատենք նախորդ գումարման Աժ պատգամավորների հետ, ապա դրամական միջոցների ծավալը նվազել է, բայց փոխարենն ավելացել է փոխառությունների ծավալը։ Արժույթային վերլուծությունը ցույց է տալիս, որ մեր պատգամավորները նախընտրում են իրենց խնայողությունները պահել հիմնականում դոլարով․ 60 տոկոսը դոլորով, 15,54 տոկոսը եվրոյով, 25,2-ը՝ դրամով», նշեց Բաբկեն Թունյանը։
Անդրադառնալով առանձին կուսակցությունների դրամական միջոցներին՝ փորձագետը նշեց, որ ամենաշատ դրամային միջոցներն ունի ՀՀԿ կուսակցությունը՝ մոտավորապես 15,4 մլրդ դրամին համարժեք, երկրորդ տեղում է «Ծառուկյան դաշինքը»՝ 13,9 մլրդ, երրորդ տեղում ՀՅԴ-ն է՝ 189 մլն, և ԵԼՔ-ը՝ 35,5 մլն։
