Երևանի Սարյանի պուրակի նկարների տոնավաճառը փակման վտանգի տակ է․ Երևանի քաղաքապետարանը խնդիրներ է ստեղծում արդեն շուրջ 20 տարի Սարյանի պուրակում նկարների ցուցահանդես-վաճառք կազմակերպող «Մայրաքաղաք» արվեստի գործիչների միություն հասարակական կազմակերպության համար։
Այս մասին ահազանգում է «Կոլորիտ» ՍՊԸ-ի տնօրեն, «Մայրաքաղաք» ԱԳՄ ՀԿ նախագահ Նարինե Վարդանյանը։ Վերջինս այս մասին օրերս բաց նամակ էր հրապարակել, որտեղ նշված էր, որ Երևանի քաղաքապետարանն այս կազմակերպության հետ չի վերակնքում տարածքի վարձակալման պայմանագիրը։ Նարինե Վարդանյանի և նկարիչների պնդմամբ, ամենայն հավանականությամբ, տարածքը հանձնվել է այլ մարդու, որը ցանկանում է մայրաքաղաքի կենտրոնական այս տարածքում այլ գործունեություն ծավալել։
«Դա բռնության է նման, որ միության անդամներին անգամ տեղյակ չպահելով՝ փորձում են ինչ-որ փոփոխություններ մտցնել, քաղաքապետարանը գոնե պետք է տեղյակ պահեր, որը, սակայն չի արել և հիմա էլ փորձում են Սարյանի պուրակն ինչ-որ ուրիշ մեկին տալ։ Արդեն 30 տարի է, որ ես այս պուրակում եմ կանգնում՝ նկարների պատվերներ եմ ընդունում, նկարում եմ և սա գեղարվեստական-մշակութային միջավայր է, ոչ թե շուկա, որ մեկից վերցնեն տան ուրիշին ․ հովանավորչությունն ու նման այլ բացասական երևույթները պակաս չեն մեր երկրից, այսինքն գալիս են մարդիկ, ովքեր մտածում են, թե իրենց դեմ խաղ չկա և փորձում են մարդկանց ձեռքից ինչ-որ բան խլել, ինչ-որ բան փոխել, քաղաքի ամենալավ տարածքներն իրենցով անել ու այդ ամենը համապատասխան կառույցների թողտվությամբ»,- «Առաջին լրատվական»-ի հետ զրույցում շեշտեց նկարիչներից մեկը։
Մեկ ուրիշ նկարիչ էլ իր հերթին հավելեց․ «Ունենք-չունենք համաշխարհային մի հատ դեմք ունենք՝ Մարտիրոս Սարյանն է, որ իրենով ենք նկարիչների միությունը ստեղծել, հիմա կանգնում ենք այս պուրակում նկարներ ենք ցուցադրում-վաճառում, մի երկու կոպեկ էլ մենք ենք աշխատում, հիմա քաղաքապետը դրել այդպիսի որոշում է կայացրել, բա էդ դեպքում մենք ի՞նչ անենք, ո՞ւր գնանք, Սարյանի արձանի հետ գնանք, թե՞ առանց արձան գնանք»։
Մանրամասները՝ տեսանյութում։
