ՀՀ ԱԺ նախագահի տեղակալ Էդուարդ Շարմազանովը Սանկտ Պետերբուրգի Մարինյան պալատում նոյեմբերի 27-ին հանդիպել է Սանկտ Պետերբուրգի Օրենսդիր ժողովի նախագահ Վյաչեսլավ Մակարովի հետ: Այս մասին տեղեկացրին ՀՀ ԱԺ հանրային կապերի վարչությունից:
Հանդիպման ընթացքում կողմերը կարևորել են հայ-ռուսական դաշնակցային հարաբերությունները և պատրաստակամություն հայտնել ակտիվ մասնակցություն ունենալ երկկողմ կապերի առավել ամրապնդման գործում:
«Հայ-ռուսական հարաբերությունները զարգանում են բոլոր ուղղություններով և կրում են իրապես դաշնակցային բնույթ»,- ընդգծել է պարոն Շարմազանովը:
ՀՀ ԱԺ փոխնախագահը շնորհակալություն է հայտնել Վյաչեսլավ Մակարովին Սանկտ Պետերբուրգում ականավոր հայորդի Միքայել Լոռիս-Մելիքովի մահվան 130-րդ տարելիցին նվիրված հիշատակի միջոցառումների կազմակերպմանն աջակցելու համար՝ նշելով, որ սա ևս մեկ առիթ է ընդգծելու հայության նշանակալի և ծանրակշիռ ներդրումը Ռուսաստանի և մասնավորապես Սանկտ Պետերբուրգի հասարակական-քաղաքական ու մշակութային կյանքում:
Հանդիպման ավարտին Էդուարդ Շարմազանովը Վյաչեսլավ Մակարովին հայ-ռուսական դիվանագիտական հարաբերությունների 25-ամյակի և Հայ-ռուսական դաշնակցային պայմանագրի 20-րդ տարեդարձի առթիվ հրավիրել է դեկտեմբերին այցելել Հայաստան:
