«Առաջին լրատվական»-ի զրուցակիցն է «Ժողովրդավարական հայրենիք» կուսակցության նախագահ, Ազգային դիմադրության ճակատի համակարգող Պետրոս Մակեյանը։
-Պարոն Մակեյան, Ազգային դիմադրության ճակատը շաբաթասկզբին պատրաստվում էր հռչակագրի տեքստ հրապարակել, բայց այն այս շաբաթ էլ չհրապարակվեց: Ո՞նր է ձգձգման պատճառը:
-Ոչ մի խնդիր հռչակագրի տեքստի հետ կապված չկա: Տեքստն ավարտված է, մնում է ստորագրեն նրանք, ովքեր միանում են: Մյուս շաբաթվա ընթացքում, կարծում եմ, կորոշենք հրապարակման տեղը և հանրությանը հասու կլինի:
-Դեռ շաբաթվա սկզբին պետք է հրապարակվեր:
-Մենք չորեքշաբթի տեքստն ավարտեցինք ճշտված բացականերով, այնուհետև քննարկեցինք հրապարակման ձևը և, բնականաբար, որոշեցինք ժամկետը՝ մյուս շաբաթ: Տեքստն ամբողջությամբ պատրաստ է, և փոփոխելու որևէ խնդիր չկա: Ձգձգումը զուտ կազմակերպչական, տեխնիկական է՝ ստորագրելու ձևը, որտեղ, երբ, ինչպես:
-Որտե՞ղ եք պատրաստվում հռչակագրի տեքստն ընթերցել:
-Քննարկումներ են ընթանում, հնարավոր է հրապարակային, հյուրանոցում: Տարբեր տարբերակներ կան, շաբաթ օրը կորոշենք:
-Հռչակագրի հրապարակումից հետո ի՞նչ գործընթացներ կլինեն:
-Հռչակագրի տեքստի հրապարակումից հետո սկսվելու է համալրման պրոցեսը: Մենք քննարկում ենք, թե ով ունի միանալու պոտենցյալ, կդիմենք իրենց, կհամաձայնվեն, կամ ոչ:
-Օրերս նաև «Հոգևոր Հայաստանը» հայտարարությամբ տեքստ հրապարակեց, որտեղ հանրությանը սթափվելու և պայքարելու կոչեր արեց: Հնարավո՞ր է՝ «Հոգևոր Հայաստանը» միանա Ազգային դիմադրության ճակատին: Կա՞ն նման քննարկումներ:
-Կարծում եմ՝ դա քննարկման խնդիր է, իրենց մոտեցումներն էլ նույնն են, ինչ մեզ մոտ, և, բնականաբար, կլինեն բանակցություններ և չեմ բացառում, որ միանանք, շատ հավանական է: Ես գիտեմ իրենց մոտեցումները, կարդացել եմ հայտարարությունը, մտահոգությունները և գնահատականները շատ մոտ են, դա հստակ է:
-Հռչակագրի տեքստն ի՞նչ բովանդակություն է ունենալու:
-Հռչակագրի տեքստը գնահատական է Հայաստանի ստեղծված իրավիճակին, և մեր լուծումներ են, որ այս իրավիճակից պետք է դուրս գանք, իսկ ճանապարհային քարտեզը ընթացքում կհրապարակենք:
-Հիմա խաղաղ պայքարի կողմնակի՞ց եք, թե՞ այլ տարբերակներ էլ եք քննարկում, այդ թվում՝ զենքով պայքարի տարբերակը:
-Առիթ ունեցել եմ ասելու, որ զենքի դաշտում սրանց մրցակից չենք կարող լինել: Մեր հիմնական գործընկերը ժողովուրդը պետք է լինի, հասարակությունը, որ այնպիսի կրիտիկական զանգված հավաքվի, որ իրենք հասկանան՝ կրակելը, զենք օգտագործելն իրենց վերջն է: Իսկ եթե հասարակության այն զանգվածը, որ եղավ, և դրանից հետո վարչախումբը խելքի չեկավ և չհանձնեց իշխանությունը, այդ դեպքում ժողովուրդն ինքը կորոշի՝ ինչ մոտեցումներով կարող է լուծումներ տալ:
-Սեյրան Օհանյանի, Րաֆֆի Հովհաննիսյանի հետ հանդիպում կայացա՞վ արդյոք:
-Պայմանավորվել եմ, առաջիկայում Րաֆֆու հետ եմ հանդիպելու, եկել է արտասահմանից: Ինչ վերաբերում է Սեյրան Օհանյանին, սպասում եմ՝ ինքն արձագանքի, դեռ չի արձագանքել:
