Թուրքական Cihan լրատվական գործակալության փոխանցմամբ, Թուրքիայի պատմագիտական ընկերության նախկին նախագահ, «Ազգայնական շարժում» կուսակցության պատգամավորական թեկնածու Յուսուֆ Հալաչօղլուն հայտարարել է, որ ժամանակին իրեն պատմագիտական ընկերության նախագահի պաշտոնից հեռացրել են հենց ԱՄՆ-ի ու Հայաստանի պատճառով.
«Բոլորը կարծում էին, թե ինձ Թուրքիայի պատմագիտական խորհրդի նախագահի պաշտոնից հեռացրել են 2007 թվականին Կայսերիում իմ հնչեցրած հայտարարությունների պատճառով: Այն ժամանակ ես նշել էի, որ իրենց քուրդ համարող շատերն ունեն թուրքմենական ծագում, մյուս կողմից՝ իրենց քուրդ և մասնավորապես քուրդ-ալևի համարողների մեծ մասն էլ մահմեդականացած հայեր են:
Սակայն կրկնում եմ, որ ես այս խոսքերի համար չեմ հեռացվել աշխատանքից: Աշխատանքից իմ հեռացվելու պատճառն այն էր, որ Թուրքիան Շվեյցարիայում Հայաստանի և ԱՄՆ-ի հետ գաղտնի բանակցություններ էր վարում, որոնք վերաբերում էին Հայոց ցեղասպանությանը:
Իմ հեռացումից հետո արդեն բոլորին հայտնի դարձավ «հայկական գործոնի» մասին: Այդ բանակցությունների ժամանակ էլ Հայաստանն ու ԱՄՆ-ը պահանջել էին ինձ հեռացնել պատմագիտական ընկերության նախագահի պաշտոնից, ինչն էլ և տեղի էր ունեցել»։
Հիշեցնենք, որ իր հակահայկական մոտեցումներով հայտնի Յուսուֆ Հալաչօլղուն Թուրքիայի պատմագիտական ընկերության նախագահի պաշտոնից հեռացվել է 2008 թվականի հուլիսի 23-ին։
