«Առաջին լրատվական»-ի զրուցակիցն է «Ֆլեշ» ընկերության նախագահ Բարսեղ Բեգլարյանը:
– Պարոն Բեգլարյան, Սերժ Սարգսյանի սեպտեմբերի 3-ին կայացրած որոշումով, փաստորեն, Հայաստանը գնում է դեպի Մաքսային միություն: Գործարար աշխարհի որոշ ներկայացուցիչներ ողջունում են Սերժ Սարգսյանի որոշումը` համարելով, որ այն կխթանի բիզնես ոլորտը: Դուք` որպես գործարար, ինչպե՞ս եք վերաբերվում Հայաստանի անդամակցմանը ՄՄ-ին:
– Ընդհանրապես, այդ փաստաթղթին մենք վերջնականապես ծանոթ չենք: Մինչև փաստաթուղթը չտեսնենք` կարծիք չենք կարող հայտնել: Կարող եմ միայն ասել, որ մեր ոլորտի հետ կապված ամենայն հավանականությամբ կարող են բարեփոխումներ կատարվել: Խոսքը Ռուսաստանից ներկրվող դիզվառելիքի և բենզինի մասին է: Գուցե այս ոլորտում տեղի ունենան որոշակի փոփոխություններ, ինչքանով որ ես տեղյակ եմ Ռուսաստանի մաքսային օրենսգրքից և մաքսային դաշտից: Մնացած հարցերով վերջնական որևէ բան ասելն այս պահին ճիշտ չէ:
– Ամեն դեպքում դրական սպասումներ ունեք Մաքսային միությունից:
– Հուսով եմ: Մաքսային միություն մտնելը ես ավելի շատ անվտանգության տեսանկյունից եմ նայում, որ Ռուսաստանը մեր ռազմավարական գործընկերն է: Ավելին ասեմ` մեր հոգեկերտվածքը, մեր մտածելակերպը մի քիչ նման են իրան: Բայց կարծում եմ, որ այս գործընթացը վերջնական չէ, քանի որ Ասոցացման համաձայնագիրը նույնպես ուժի մեջ է: Այնտեղ, իհարկե, կա առևտրի ազատ գոտու խնդիրը, որտեղ կարծես, ասում են, կա հակասություն Մաքսային միության հետ: Այդ հարցերը քննարկման փուլում են, և ես կարծում եմ, որ վերջնական ոչինչ չկա: Այս պահին ինչ էլ որ ասվի վերսիայի մակարդակով` կարող ենք սխալվել:
– Եվրոպացի պաշտոնյաներն ասում են, որ այդ երկու միություններն անհամատեղելի են: Կարծում եք` Ասոցացման համաձայնագիր կստորագրվի՞:
– Կարծում եմ` այո, որովհետև մենք շատ-շատ հարցերում եվրոպացի ենք և ճանապարհ ունենք անցնելու եվրոպացիների հետ: Այն տեսակետը, որ ժամանակին հայտնվել է քաղաքական գործիչների կողմից և մասնավորապես Սերժ Սարգսյանի կողմից, որ «և-և», ոչ թե «կամ-կամ», դա, կարծում եմ, դեռևս ակտուալ է, և կարծում եմ` Ասոցացման պայմանագիր ևս կստորագրվի: Բանակցություններ են ընթանում, և միանգամից ասել, որ մենք հրաժարվում ենք եվրոպացիներից` այդպես չէ:
– Եթե ամեն դեպքում վերջնական որոշում կայացվի` մտնել Մաքսային միություն, գործարար աշխարհի կապն ինչ-որ ձևով կխզվի՞ Եվրոպայի հետ:
– Չեմ կարծում: Ես ուղղակի կարծում եմ, որ եվրոպական չափանիշները բիզնես առումով, ապրանքատեսակների որակի չափորոշիչների առումով` մենք դեռ չենք հասել այդ աստիճանին, և Եվրոպայի պահանջներն այդ առումով մի քիչ ավելի շատ են: Այստեղ մենք կարող ենք որոշակի կորուստներ ունենալ այն առումով, որ Եվրոպայից որոշ ապրանքատեսակներ կներկրենք, բայց արտահանելու հետ կապված խնդիրներ կունենանք: Բայց դա ժամանակի հարց է: Մենք ամեն դեպքում պետք է ձգտենք եվրոպական չափանիշներին, առանց դրա չենք կարող:
– Պարոն Բեգլարյան, Մաքսային միությունից հետո ակտիվացավ նաև վարչապետ Տիգրան Սարգսյանի փոփոխության հարցը: Հաշվի առնելով, որ Դուք մտերիմ հարաբերությունների մեջ եք վարչապետի հետ, կարո՞ղ եք ասել` սպասվո՞ւմ է Տիգրան Սարգսյանի պաշտոնանկություն:
– Կարծում եմ, որ դա լրագրողների երևակայություններն են: Ես բիզնեսմեն եմ և իրավասու չեմ նման հարցերի պատասխանել: Կան քաղաքական որոշումներ, երկրի նախագահ կա, քաղաքական մեծամասնություն կա, կոալիցիա կա:
– Եթե դրվի վարչապետի պաշտոնանկության հարցը, կօգտագործե՞ք Ձեր կապերը նրան օգնելու համար:
– Գիտեք ինչ կա, կապերը քաղաքական կատեգորիա չեն: Եթե ես այս պահին որևէ միտք ասեմ, դա կլինի անազնիվ և ոչ հեռատես:
– Ձեր մտերիմ վարչապետի անունը շրջանառվում է նաև օֆշորային սկանդալի մեջ: Դրան ինչպե՞ս եք վերաբերվում: Փորձել՞ եք նրանից պարզել իրականությունը:
– Գիտեք ինչ կա, օֆշորում կամայական մարդ կարող է գրանցվել, հաշիվ ունենալ: Իմ կարծիքով` դա չափազանցված է, շահարկում է, և կարծում եմ` այստեղ վարչապետին վարկաբեկելու խնդիր կար:
– Ո՞ւմ կողմից:
– Չգիտեմ, քաղաքական որոշ ուժերի կողմից:
– Կճոյանին է՞լ էին փորձում վարկաբեկել: Նրա անունն էլ է շրջանառվում օֆշորային սկանդալում, և նա ևս Ձեր մտերիմն է համարվում:
– Դուք բոլորդ մոռանում եք, որ Կճոյանը քաղաքականության մեջ չկա, նա հոգևորական է, բավականին բարձր պաշտոնյա է: Բայց քանի որ վարչապետի հետ ունեն բարեկամական կապեր, իր անունն էլ է կապվում:
– Բայց Կճոյանի անունը մշտապես շրջանառվում է տարբեր սկանդալների մեջ:
– Ինչ կարող եմ ասել…
– Ինչպե՞ս է Ձեր բիզնեսը:
– Շատ լավ, հոյակապ, հրաշալի: Այսօր մի քիչ վտանգված է այնքանով, որ արտագաղթ կա: Այսօր ինձ մտահոգում է մեր երկրի արտագաղթը: Այդ հարցը շատ է մտահոգում:
– Իսկ որպես խոշոր գործարար ի՞նչ քայլեր եք ձեռնարկում արտագաղթը կանխելու համար:
– Ինչքան որ ինձանից կախված է` ես անում եմ: Բայց այդ արտագաղթի աղբյուրները և խորքային պատճառները պետք է պարզել:
– Ո՞րն է, Ձեր կարծիքով, արտագաղթի բուն պատճառը:
– Չգիտեմ, չեմ կարող ասել:
– Ժողովուրդը հիմնականում սոցիալական ծանր վիճակից, աղքատությունից ու իշխանությունների պատճառով է հեռանում երկրից:
– Չէ՛, իմ կարծիքով` դա մի քիչ ազգային մենթալիտետի խնդիր է: Հայ ազգը սիրում է ման գալ, մի տեղ գտնել: Առաջնորդվում է` որտեղ հաց, այնտեղ կաց սկզբունքով, որին ես դեմ եմ:
– Պարոն Բեգլարյան, Կոմիտաս 5-ի շինարարությունը Ձեր անվան հետ էր կապվում: Շենքն իսկապե՞ս Ձեզ է պատկանում:
– Դրանք հեքիաթներ են: 28 հատ պեչատով, 48 հատ ստորագրությամբ կտամ իրենց: Բոլորն էլ գիտեն, որ դա դաշնակներինն է եղել: Այստեղ այլ կարծիք չկա:
