Եթե Սերժ Սարգսյանը կազինոյում խաղար, համապատասխան գաղտնի ծառայություններն անպայման կիմանային այդ մասին և փաստը կօգտագործեին մեր երկրի դեմ: Այսօր տեղի ունեցած մամուլի ասուլիսի ժամանակ այս մասին ասաց Հայաստանի դեմոկրատական կուսակցության նախագահ Արամ Գ.Սարգսյանը:
«Կարծում եմ` ՀՀԿ-ն, և ոչ թե Սերժ Սարգսյանը պետք է դատի տա Զարուհի Փոստանջյանին, այլապես ամեն բան նմանվում է պրովինցիալիզմի: Խոսքը պետության հեղինակության մասին է: Ամեն մարդ կարող է ասել մի բան կամ որևէ մեկի վրա ցեխ շպրտել`իմանալով, որ չի պատժվի: Պետք չէր Սերժ Սարգսյանին ԵԽԽՎ-ում կազինոներում խաղալու մասին հարց տալ: Ի՞նչ է, մեր ներքին խնդիրներն ուզում ենք ուրիշի տա՞նը լուծել: Ուզում ենք, որ դրսի քեռի՞ն գա ու մեր խնդիրները լուծի»,- նշեց նա` հավելելով, որ թեպետ իր ասածը կոնկրետ Փոստանջյանին չի վերաբերում, սակայն Հայաստանում քիչ չեն մարդիկ, ովքեր որոշ գործողությունների դիմաց կոնկրետ ուժերի կողմից ֆինանսավորվում են:
Արամ Սարգսյանի խոսքով՝ գենդերային հավասարության մասին օրենքի դիմաց Արժույթի միջազգային հիմնադրամից ֆինանսավորում է ստացել նաև կառավարությունը: «Պարոն վարչապետից, սրանից բացի, պետք է բացատրություն պահանջել նաև գազի գնի բարձրացման համար»,- ասաց նա:
Քաղաքական գործչի գնահատմամբ՝ մենք ճահճի մեջ ենք, որը կոչվում է խոր գավառականություն: «Ինչ վերաբերում է վերջին տարիներին իրականացվող արտաքին քաղաքականությանը, ապա կասեմ, որ նկատելի սայթաքումներ չեն եղել: Օրինակ՝ ԵԽԽՎ-ում Սերժ Սարգսյանն ադրբեջանցիներին բացատրեց, թե ինչ կլինի իրենց հետ պատերազմ սկսելու դեպքում»,- ասաց նա` շեշտելով, որ երկրի ղեկավարի ելույթից ինքը հավանել է հատկապես այդ հատվածը:
Ամփոփելով` Արամ Սարգսյանն անդրադարձավ Հայաստանի` ԵՄ-ՄՄ անդամության թեմային` նշելով, որ ճիշտ քաղաքական գիծ իրականացնելու դեպքում լիովին հնարավոր է ընդգծել մեր երկրի դերակատարությունը երկու ծրագրերում էլ:
Հիշեցնենք`ԵԽԽՎ աշնանային նստաշրջանում` հարց ու պատասխանի ժամանակ, ԵԽԽՎ հայաստանյան պատվիրակության անդամ Զարուհի Փոստանջյանը հարց էր հղել Սերժ Սարգսյանին: Նա հարցրել էր, թե Եվրոպայում արձակուրդի ժամանակ որքա՞ն գումար է տանուլ տվել Սերժ Սարգսյանը կազինոյում: Նախագահը նրան պատասխանել էր, որ ինքը երբևէ կազինո չի գնացել և գումար տանուլ չի տվել: «Ցավոք սրտի, 70 մլն-ի չեմ տիրապետում և եթե ունենայի, մի մասը ձեզ կնվիրեի, որպեսզի դուք կյանքից այսքան դժգոհ չլինեիք»,- ասել էր Սերժ Սարգսյանը:
Լուսանկարը՝ Photolure-ի
