Իրանական Fars գործակալությունը հաղորդել է, որ CNN ամերիկյան հեռուստաալիքի հաղորդավարը խեղաթյուրել է Իսլամական Հանրապետության կողմից Հոլոքոստի փաստը ճանաչելու մասին Իրանի նախագահ Հասան Ռուհանիի մեկնաբանությունը:
Գործակալությունը ներկայացրել է Ռուհանիի հայտարարության հստակ թարգամությունը, որը խեղաթյուրվել և կրճատվել էր CNN-ի աշխատակցի կողմից, ինչի հետևանքով համաշխարհային ԶԼՄ-ները հաղորդել էին, որ Իրանը ճանաչել է Հոլոքոստի փաստը:
«Ինչպես նախկինում ասել եմ, ես պատմաբան չեմ: Միայն պատմաբանները պետք է հստակ սահմանում տան, ձևակերպեն և մեկնաբանեն պատմական իրադարձությունը: Սովորաբար մենք դատապարտում ենք ցանկացած հանցագործություն մարդկության դեմ, որը կատարվել է քաղաքակրթության պատմության ցանկացած փուլում: Դա վերաբերում է նաև նացիստական հանցագործություններին՝ ընդդեմ հրեաների և այլ ժողովուրդների: Մենք դատապարտում ենք ցեղասպանությունը և հանցագործությունը, եթե դրանք մեր օրերում կատարվում են ցանկացած ժողովրդի և դավանանքի դեմ: Հետևաբար այն, ինչ արել են նացիստները, պետք է դատապարտվի: Սակայն պատմական փաստերին, որոնց մասին դուք խոսում եք, պետք է սահմանում տան միայն պատմաբանները և հետազոտողները: Ես պատմաբան չեմ» ,- գործակալության փոխանցմամբ՝ իրականում այսպես է եղել պատասխանն այն հարցի, թե արդյոք Ռուհանին ճանաչո՞ւմ է Հոլոքոստը:
Հարկ է նշել, որ ավելի ուշ ամերիկյան մեկ այլ հեռուստաընկերության՝ NBC News-ի թղթակիցը Իրանի նախագահից ևս խնդրել է կիսվել իր տեսակետով Հոլոքոստի վերաբերյալ: Այս անգամ Ռուհանին զերծ է մնացել գնահատականներից՝ հայտարարելով, որ ինքը պատմաբան չէ, քաղաքական գործիչ է:
«Մեզ համար կարևոր է, որպեսզի տարածաշրջանի բոլոր երկրները զարգանան և ավելի մոտ դառնան իրար, որպեսզի հնարավոր լինի կանխել ագրեսիան և անարդարությունը»,- ընդգծել է Ռուհանին:
