Նյու Յորքում բազմաթիվ բնակարաններ կան, որոնց ներքին հարդարումը ցնցում է երևակայությունը: Այդ բնակարանների տերերն իրենց բնակարաններն իսկական արվեստի օբյեկտների են վերածել:
Այս բնակարանը գտնվում է Կենտրոնական զբոսայգու հարևանությամբ: Դրա ընդհանուր մակերեսը 390 ք/մ է: Բնակարանը երեք ննջարան, երկու լոգարան, ճաշասենյակ, գինիների պահեստ, գրադարան և մեծ խոհանոց ունի: Սենյակների ներքին հարդարումը ցնցում է երևակայությունը, օրինակ՝ դրանցից մեկում 17-րդ դարի 2,5 մետրանոց բուխարի կա, որը բերվել է Պիրինեյան թերակղզուց: Առաստաղի բարձրությունը 7,3 մետր է կազմում, իսկ պատուհաններից հիանալի տեսարաններ են բացվում:
Դրանից բացի, ներքին հարդարման առարկաների մեջ արվեստի իսկական գործեր կան: Փայտե սեղանն ու աթոռները պատրաստվել են հայտնի դիզայներ Ջորջ Նակաշիմայի կողմից: Առաստաղի հեղինակը մադրիդցի նկարիչ Ռամոն Կանեն է: Փայտե աշխատանքները կոլումբիացի նկարիչ Մարիա Ֆերնանդա Կարձոյի գործերն են, իսկ պատերից մեկը զարդարում է բրազիլացի Անտոնիո Դիասի նեոնե աշխատանքը:
Այստեղ կա նաև 2500 տարի առաջ պատրաստված հախճապակի և մի ժամանակ Այզեկ Սթերնին պատկանող դաշնամուրը: Բնակարանի ներկայիս տերերը ցանկանում էին այն վաճառել 20 միլիոն դոլարով, սակայն դրա գինն իջեցվել է մինչև 17,5 միլիոնի:
