Ադրբեջանական Salam News գործակալության փոխանցմամբ՝ հունիսի 12-ին կայանալիք խորհրդարանական ընտրություններից առաջ Թուրքիայի վարչապետ Էրդողանն իր նախընտրական քարոզչության շրջանակներում երեկ Քայսերի քաղաքում հանդիպում է ունեցել իր համակիրների հետ։
Հանդիպման ժամանակ Էրդողանը բոլոր ընդդիմադիր կուսակցություններին մեղադրել է իր գլխավորած «Արդարություն և զարգացում» կուսակցության (ԱԶԿ) դեմ դավ կազմակերպելու մեջ։
Էրդողանի կարծիքով, գլխավոր ընդդիմադիր ուժ հանդիսացող Ժողովրդա-հանրապետական կուսակցությունը (ԺՀԿ), երկրորդ գլխավոր ընդդիմադիր ուժ «Ազգայնական շարժում» կուսակցությունը (ԱՇԿ) և քրդական «Խաղաղություն ու ժողովրդավարություն» կուսակցությունը (ԽԺԿ) ստեղծել են այսպես կոչված «եռյակ միություն» և իրենց առջև խնդիր են դրել հասարակության շրջանում վարկաբեկել ԱԶԿ-ն։
Էրդողանը նշել է. «ԺՀԿ-ն և ԱՇԿ-ն ձևացնում են, թե չեն տեսնում իշխանության դեմ իրականացված ահաբեկչական փորձերը։ ԽԺԿ-ն էլ մանիպուլացնում է այդ հարցը։ ԺՀԿ նախագահը խամաճիկ է, որին մատների վրա խաղացնում է անգամ ԽԺԿ-ն»։
Հիշեցնենք, որ թուրքական ընդդիմության առաջնորդ Քեմալ Քըլըչդարօղլուն իր նախընտրական քարոզչության շրջանակներում շեշտը դրել է քրդական գործոնի վրա, և այդ նպատակով թողարկել հատուկ գրքույկ, որում խոստանում է բացառապես ժողովրդավարական եղանակով լուծել «Քրդական հարցը»։
