Հայաստանը ցանկություն ունի անդամակցել Մաքսային միությանը և հետագայում մասնակցել Եվրասիական տնտեսական միության ձևավորմանը: Ռուսաստանի նախագահ Վլադիմիր Պուտինը հավանություն է տվել այդ որոշմանը և պատրաստակամություն հայտնել աջակցել այդ գործընթացին: Այս մասին երեկ իրենց հանդիպումից հետո համատեղ հայտարարություն էին արել ՀՀ և ՌԴ նախագահները:
«Առաջին լրատվական»-ի հետ զրույցում Սերժ Սարգսյանի այս որոշմանն անդրադարձավ «Հայաստանի եվրոպացի բարեկամներ» կազմակերպության գլխավոր քարտուղար Մայքլ Քամբեքը: Նա կարծիք հայտնեց, որ Հայաստանի այս որոշումը պլանավորված չէր, և այն ազատ որոշում չէր: Քամբեքն ասաց, որ Սերժ Սարգսյանն այն ղեկավարն է, ով ջանքեր էր ներդնում բարեփոխումների և Ասոցացման համաձայնագրի նախաստորագրման ուղղությամբ: «Սակայն 180 աստիճանով տարբեր որոշում է կայացվում և հակառակ ուղղությամբ ընթանում գործընթացը: Հայաստանում, ԵՄ-ում պատրաստ չէին սրան, մեծ քաոս է ստեղծվել, ինչն էլ ապացուցում է, թե որքանով էր այն ռազմավարական և ծրագրված որոշում»,- ակնարկեց կազմակերպության գլխավոր քարտուղարը:
Նրա խոսքով՝ առաջինը, որ պետք է քննարկել, այն է, որ շատ վաղ է դիտարկել, թե ինչ խնդիրներ կառաջանան այս որոշման արդյունքում, և ինչպես պետք է դրանք լուծել: Նրա համոզմամբ՝ մեկ բան պարզ է՝ որոշումը ԵՄ-ի դեմ չի կայացվել, իսկ եթե հաջորդող օրերի ընթացքում պարզվի, թե ինչ համաձայնություն է ձեռք բերվել Մոսկվայում, ապա պարզ կլինի՝ ինչ հետևանքներ կլինեն և ինչպիսի լուծումներ կարելի է դրանց տալ:
«Հայաստանի եվրոպացի բարեկամներ» կազմակերպության գլխավոր քարտուղարն ընդգծեց, որ Ասոցացման համաձայնագիրը, ինչպես նախագծված էր մինչ օրս, համատեղելի չէ Մաքսային միության հետ՝ թե՛ տեխնիկական, թե՛ իրավական պատճառներով: Ուստի նա ակնարկեց, որ միանալով ՄՄ-ին՝ Հայաստանը չի կարող ստորագրել Ասոցացման համաձայնագիրը:
Սակայն, ինչպես նկատեց նա, դա չի նշանակում, որ հնարավոր չէ գտնել խնդիրների լուծման այլ ուղիներ: «Դրա համար եմ ասում, որ պետք է ուսումնասիրել, թե կոնկրետ ինչ համաձայնություն է ձեռք բերվել Մոսկվայում: Պետք է տեսնել, թե ինչ տարբերակներ ունի Հայաստանը: Եթե Հայաստանի որոշումներն անկախ են, ապա կարծում եմ, որ բոլոր խնդիրներին լուծում կգտնվի, ես լիահույս եմ»,- ասաց նա:
Ինչպե՞ս կարձագանքի Բրյուսելը այս որոշմանը՝ հարցին նա պատասխանեց, որ դա կախված է նրանից, թե ինչ կբացահայտվի առաջիկա ժամերի և օրերի ընթացքում, երբ տեսնենք, թե Հայաստանը որքանո՞վ է ազատ եղել որոշումներ կայացնելիս: Ըստ նրա՝ եթե տպավորություն լինի, որ Հայաստանը, Մոլդովան, Ուկրաինան անկախ որոշումներ չեն կայացնում, ապա ԵՄ-ի արձագանքը կլինի բոլորովին անսպասելի:
«Կարծում եմ, որ Բրյուսելի արձագանքը խիստ է լինելու: Բայց եկեք սպասենք և տեսնենք, թե ինչ համաձայնություն է ձեռք բերվել Մոսկվայում»,- ասաց Մայքլ Քամբեքը:
