ՀՀ Մարդու իրավունքների նախկին պաշտպան Կարեն Անդրեասյանը «Համախմբում» կուսակցությունից դուրս գալու դիմում գրել է դեռ մեկ ամիս առաջ։ «Առաջին լրատվական»-ի հարցին՝ դիմումին արձագանք եղե՞լ է, թե՞ ոչ, Անդրեասյանը պատասխանեց. «Դա մեխանիկական հարց է, համարեք, որ այլևս կուսակցության անդամ չեմ։ Քննարկելու շատ բան չկա»։
Հիշեցնենք, որ Կարեն Անդրեասյանը թե՛ կուսակցության վարչության նիստերում և թե՛ հրապարակավ իր անհամաձայնությունն էր հայտնել այն հարցում, որ դաշինքի ցուցակը գլխավորի ՀՀ պաշտպանության նախկին նախարար Սեյրան Օհանյանը։ Վերջինս, ըստ Անդրեասյանի, պետք է նախ անցներ քաղաքական քավարանով։
Կարեն Անդրեասյանից հետաքրքրվեցինք, թե առաջիկայում ի՞նչ ծրագրեր ունի։ Մամուլի հրապարակումների համաձայն՝ նրան գործնական առաջարկ է եղել Վրաստանից, հարցրինք՝ արդյոք ընդունե՞լ է այդ առաջարկը. «Գործընթացը գնում է, կան բիզնես-նախագծեր, որոնց մեջ ինչ-որ մասնակցություն կա։ Երբ վերջնական լինի՝ կհրապարակեմ»։
Դիտարկմանը՝ փաստորեն իրեն այլևս քաղաքականության մեջ չենք տեսնի, նախկին օմբուդսմենն արձագանքեց. «Ո՛չ։ Ճիշտ չհասկացաք։ Չեք իմանա՝ որտեղ կտեսնեք»։
Արդյոք նախընտրական քարոզարշավին որևէ ձևաչափով մասնակցություն կունենա՞, թե՞ ոչ՝ հարցին ի պատասխան էլ Կարեն Անդրեասյանն ասաց. «Ոչ, եթե կուսակցական չեմ, քարոզարշավին մասնակցություն չեմ ունենա։ Բայց եթե կարիք լինի՝ իմ կարծիքները կարտահայտեմ»։
