Օրերս Արցախում տեղի ունեցածը ինչո՞ւ այդպես էլ չարժանացավ Հայաստանի իշխանությունների արձագանքին, այդպես էլ պաշտոնական հայտարարություններ չտեսանք ո՛չ ՀՀ նախագահի, ո՛չ ԱԺ նախագահի, ո՛չ էլ վարչապետի կողմից. ««Առաջին լրատվական»- ի հետ զրույցում, անդրադառնալով այս հարցին, ԱԺ ՀՀԿ խմբակցության ղեկավար Վահրամ Բաղդասարյանը նշեց. «Դիվերսիոն խմբերի մուտք գործելու մասին ՀՀ պաշտպանության նախարարությունն արել է հայտարարություն, անմիջապես կանխվել են այդ գործողությունները, ադրբեջանական կողմը թողել է 5 զոհ՝ չեզոք գոտում, հայկական կողմը չունի զոհեր և վիրավորներ: Իրավիճակը վերահսկվում է, և այդ մասին, կարծում եմ, պետք չէ քաղաքական մեկնաբանություններ տալ:
ՀՀ պաշտպանության նախարարության մամլո խոսնակը և Արցախի Հանրապետության ՊԲ մամլո խոսնակը տվել են պարզաբանումներ, պետք է բավարարվենք դրանով»:
Վ. Բաղդասարյանը հավաստիացրեց, որ ՀՀ ԶՈՒ-ն և համապատասխան մարմինները միջազգային գործընկերներին իրազեկել են իրավիճակի մասին:
«Անվտանգություն և առաջընթաց». ՀՀԿ այս կարգախոսի վերաբերյալ Վահրամ Բաղդասարյանը նշեց, որ դա ապագային միտված կոչ է, որին պետք է հասնել. «Անվտանգության ապահովման պայմաններում մենք պետք է առաջընթաց ունենանք»:
ՀՀԿ խմբակցության ղեկավարն անդրադառնալով օրերս իշխանական թեկնածուների միջև տեղի ունեցած ծեծկռտուքներին՝ նշեց, որ Բազմասեր Առաքելյանի և ՀՅԴ-ական թեկնածուի միջև տեղի ունեցած միջադեպի առնչությամբ քրեական գործ է հարուցվել, իսկ ԱԺ պատգամավորներ Մուրադ Մուրադյանի և Արայիկ Գրիգորյանի կողմնակիցների միջև տեղի ունեցած միջադեպի առնչությամբ դեռ փաստեր չկան, ուսումնասիրվում են:
«Ընտրության ժամանակ լինում են ավելի բարդ դեպքեր ամբողջ աշխարհով մեկ, մենք պետք է ձեռնպահ մնանք նման դեպքերից: Խստագույնս պետք է պատժվեն ոչ միայն ծեծկռտուքի մասնակիցները, այլ նաև նրանք, ում պատճառով ծեծկռտուք կլինի»,- նշեց Վ. Բաղդասարյանը:
Մանրամասները՝ տեսանյութում:
