Լատվիայի և Ռուսաստանի սահմանին 23 կմ երկարությամբ ցանկապատ են կառուցել անօրինական ներգաղթյալների ներթափանցմանը խոչընդոտելու համար: Այս մասին հայտնում է Delfi առցանց-պորտալը՝ հղում անելով Լատվիայի Պետական սահմանապահ ծառայության մամլո քարտուղար Եվգենիա Պոզնյակին:
«Ցանկապատի կառուցման աշխատանքները սկսվել են 2015 թ., դրանք նախատեսվում է ավարտել մինչև 2019 թ.: Ներկայումս սահմանին կառուցվել է 65 կմ երկարությամբ սահմանագիծ, նաև 23 կմ երկարությամբ ցանկապատ է մոնտաժվել»,- լրագրողներին ասել է Պոզնյակը:
2017 թ. սահմանի բարելավման համար 6,3 մլն եվրո է հատկացվել, որով նախատեսվում է սարքավորել 150 կմ երկարությամբ սահմանագիծը և 60 կմ ցանկապատ կառուցել, հայտնել է Պոզնյակը:
Ցանկապատի նվազագույն բարձրությունը 2,7 մ կկազմի, ներառալ՝ փշոտ մետաղալարը:
Ռուս-լատվիական սահմանի ընդհանուր երկարությունը 276 կմ է, ցանկապատ կկառուցվի 193 կմ մասում՝ այն հատվածում, որտեղ բնական խոչընդոտ չկա: Ցանկապատի կառուցման համար նախատեսվում է ընդհանուր 17 մլն եվրո ծախսել:
