Ամերիկյան մի շարք խոշոր ընկերությունների ղեկավարներ միացել են փախստականների մասին ԱՄՆ նախագահ Դոնալդ Թրամփի հրամանի քննադատությանը։ Այս մասին հայտնում է Mashable պորտալը։
«Apple-ը չէր կարողանա գոյություն ունենալ առանց ներգաղթյալների, դեռ չասած ծաղկելու ու զարգանալու մասին, ինչը տեղի է ունենում հիմա»,-մեջբերում է պարբերականը կորպորացիայի ղեկավար Թիմ Կուկի խոսքերը։
Կուկը նշել է, որ որոշ աշխատակիցների վրա Թրամփի նոր հրամանն անդրադարձել է ուղղակիորեն, և ընկերությունը կանի ամեն բան՝ նրանց օգնելու համար։ Apple-ի ղեկավարի խոսքով՝ կորպորացիան արդեն կապ է հաստատել Սպիտակ տան հետ և փորձել բացատրել, թե որքան բացասկան կլինի հրամանի էֆեկտը։
Uber-ի ղեկավար Տրևիս Կալանիկը նույնպես անհանգստություն է արտահայտել նախագահի քաղաքականության առնչությամբ և հայտարարել, որ իր աշխատակիցները հայտնվել են հարվածի տակ։ Կալանիկի խոսքով՝ հրամանն անդրադարձել է հազարավոր վարորդների վրա։
Քննադատությանը միացել են նաև Netflix-ի ղեկավար Ռիդ Հեյսթինգսը և Twitter-ի ղեկավար Ջեք Դորսին, ովքեր հայտարարել են, որ իրենց ընկերություններն ավելի հաջող են դարձել այն բանի շնորհիվ, որ այնտեղ ներգաթյալներ են աշխատում։ Դորսին նշել է, որ նոր հրամանը վնաս կհասցնի տնտեսությանը։
Ավելի վաղ Facebook սոցցանցի հիմնադիր Մարկ Ցուկերբերգը նշել էր, որ ԱՄՆ-ը ներգաղթյալների ազգ է, և որ պետք է հպարտանալ դրանով։
