Վերջին օրերին հայ ֆուտբոլասերների շրջանում լայն քննարկումներ են ծավալվել Երևանի «Արարատի»՝ Ռուսաստանի առաջին դիվիոզիոնի առաջնությանը հնարավոր մասնակցության վերաբերյալ: Մասնավորապես, «Արարատի» գլխավոր մարզիչ Արկադի Անդրեասյանը հայտարարել էր, որ երևանյանը ակումբի ղեկավարությունն արդեն իսկ հայտով դիմել է Ռուսաստանի ֆուտբոլի միությանը և սպասում են պատասխանի: Թեև մի քանի լրատվամիջոցներ վերջին օրերին փորձում են կանխատեսել, թե ինչ զարգացումներ կլինեն «Արարատի» մասնակցության դեպքում, շտապենք փաստել, որ մեր թիմն ուղղակի չի կարող խաղալ ռուսական լիգայում: Պաշտոնական տվյալների համաձայն՝ Ռուսաստանի առաջին լիգայում հանդես եկող 20 թիմերից այսօր ֆինանսական առումով ամենահամեստը Կալինինգրադի «Բալթիկան» է և մերձմոսկովյան «Խիմկին»: Այս թիմերի տարեկան բյուջեն կազմում է 150 միլիոն ռուբլի, կամ մոտ 2.4 միլիոն ԱՄՆ դոլար: Ամենահարուստ ակումբը համարվում է Կրասնոդարի «Կուբանը», որի բյուջեն կազմում է մեկ միլիարդ 200 միլիոն ռուբլի: Առաջին լիգայի 12 թիմեր այսօր գոյատևում են պետական աջակցության շնորհիվ: Ավելի ստույգ՝ Ռուսաստանի առաջին լիգայի մասնակից թիմերի մեծ մասը ֆինանսական օգնություն է ստանում մարզպետարաններից, քաղաքապետարաններից և պետական այլ կառույցներից:
Ռուսաստանի առաջին լիգայի հանդիպումների զգալի մասն անցնում է կիսադատարակ տրիբունաների ներքո: Մեծ չէ նաև հեռարձակումները դիտող մարզասերների զանգվածը, ուստի՝ ակումբները ինքնագոյատևելու ռեսուրս չունեն: Այսօր Երևանի «Արարատը» մեծ դժվարությամբ և ուշացումներով է վճարում իր ֆուտբոլիստների ամսական մի քանի հարյուր դոլար կազմող աշխատավարձը: Ավելին՝ Հայաստանի ընթացիկ առաջնությունում «Արարատը» վեց թիմերի պայքարում ընթանում է վերջին հորիզոնակնում: Հիմք ընդունելով «Արարատի» ներկայիս վիճակը և որոշակի պատկերացում ունենալով ռուսական լիգայի վերաբերյալ, Անդրեասյանի հայտարարությունը ոչ այլ ինչ է, քան փուչիկ: Ենթադրենք՝ «Արարատի» սեփականատերերը պատրաստ են տարեկան 2 միլիոն դոլար «գցելու ջուրը»: Այդ դեպքում ավելի ճիշտ չէ՞ր լինի այդ գումարը ավելի պատեհ ծրագրերի վրա ծախսել:
Ինչ խոսք՝ «Արարատի» մասնակցությունը նշված առաջնությանը անհնար է տեղացի ֆուտբոլիստներով: Բացի այն, որ մեր խաղացողները մի քանի գլուխ ցածր են Ռուսաստանի առաջին լիգայում հանդես եկող ֆուտբոլիստներից, այս մրցաշարում կա խիստ սահմանափակում լեգեոներների նկատմամբ: Մասնավորապես, թիմի կորիզը պետք է կազմեն ՌԴ քաղաքացիություն ունեցող ֆուտբոլիստները: Ենթադրենք նաև, որ ՌԴ սպորտի նախարարությունը դրական պատասխան կտա «Արարատի» ղեկավարությանը: Վերջինս ուզած, թե չուզած պետք է ձևավորի ռուս ֆուտբոլիստներից կազմված կոլեկտիվ և փաստացի՝ որպես ռուսական թիմ խաղա առաջին լիգայում: Կարծում ենք շատ ավելի նպատակահարմար կլիներ, եթե «Արարատի» սեփականատերերը տարեկան երկու միլիոն ծախսեին ակումբի ենթակառուցվածքները կարգի բերելու և մանկապատանեկան թիմեր ձևավորելու համար:
Արդեն նախօրեին, Ռուսաստանի ֆուտբոլի միության փոխնախագահ, լեգենդար Նիկիտա Սիմոնյանը rusarminfo-ի հետ զրույցում հայտարարել է, որ «Արարատի» մասնակցությունը ՌԴ առաջին լիգայում անհնար է: «Հայաստանը և Ռուսաստանը տարբեր պետություններ են, հետևաբար հայկական ոչ մի թիմ չի կարող մասնակցել Ռուսաստանի ֆուտբոլի առաջնությանը: Եթե այդպիսի բան տեղի ունենա, ապա հաջորդ օրն այլ երկրների ակումբներ նույնպես ցանկություն կհայտնեն ելույթ ունենալ Ռուսաստանում»,- ասել է Սիմոնյանը: Այսքանից հետո մնում է միայն մտորել՝ որն էր Անդրեասյանի նման հայտարարության նպատակը:
Ուշադրությունը կենտրոնացնել «Արարատի» վրա, թե՞ ֆուտբոլասերների աչքերին «թոզ փչելով»՝ փորձել համոզել, որ թիմը լուրջ ռեսուրսներ ունի և Հայաստանում անհաջողությունների պատճառը ՀՖՖ-ի հետ ոչ այնքան ջերմ հարաբերություններն են: Կարծում ենք, որ «Արարատում» հանդես եկող ֆուտբոլիստները չպետք է տուժեն ակումբի տերերի ինչ-որ խռովությունների պատճառով: Ավելին՝ «Արարատ» ակումբը ապացուցելու համար, որ ունի ռեսուրսներ, լուրջ քայլերի դիմելու համար առաջին հերթին պետք է նորմալ վարձատրի իր խաղացողներին և ուշադրություն դարձնի ենթակառուցվածքներին:
