Մեծ Բրիտանիայի բնակիչներ Ռիչարդ և Սոֆի Վինձորները որոշել են իրենց կլեպտոման կատու Նորիսի զոհերին վերադարձնել գողացված իրերը: Նման քայլի զույգը որոշել է դիմել, երբ հասկացել է, որ կատուն գնալով ավելի ու ավելի շատ օտար իրեր է բերում տուն:
Կատվի գործողությունների պարզաբանման համար Վինձորները հարևաններին նամակ են գրել, որում կոչ են արել նրանց հիշել՝ իրենց տնից ինչ-որ բան չի՞ կորել, և եթե կորել է, ապա դիմեն իրենց: Այս մասին հայտնում է Lenta.ru-ն:
Զույգը նշել է, որ Նորիսը երկու տարեկան է: Մեկ տարի առաջ նրա մոտ նման դրսևորումներ չեն եղել: Կենդանին, սակայն, վերջին շրջանում սկսել է տուն բերել ներքնազգեստ, մարզաշապիկներ, սնունդ, ափսե լվանալու սպունգներ և այլն:
Ինչ-որ գողացված իր տուն բերելով՝ կատուն սկսում է մլավել՝ իր վրա ուշադրություն գրավելու համար: Տերերը որոշել են այլևս ուշադրություն չդարձնել կատվի մլավոցներին՝ հասկացնելու նրան, որ այդ իրերն իրենց չեն հետաքրքրում:
