Սիրիական ազատ բանակի ստորաբաժանումները և «Ալ-Կաիդայի» հետ կապված իսլամիստները, որոնք ներկայացնում են Սիրիայի նախագահ Բաշար Ալ-Ասադի դեմ կռվող ընդդիմությանը, ուղիղ զինված հարձակումներ են սկսել միմյանց դեմ:
Ինչպես հաղորդում է «Կոմերսանտը», ամենալուրջ միջադեպը տեղի է ունեցել Սիրիայի հյուսիսարևմտյան Իդլիբ մարզում, որտեղ իսլամիստները հարձակվել են Սիրիական ազատ բանակի զենքի պահեստի վրա: Հարձակումը կազմակերպել է «Իրաքի և Լևանտի իսլամական պետություն» խմբավորումը: Ազատ բանակի դաշտային հրամանատարները նախընտրում են լռել մարտի արդյունքների և այն մասին, թե արդյո՞ք իսլամիստներին հաջողվել է վերցնել զենքը:
Հոգեբանական տեսանկյունից միջհամայնքային երկպառակությունների համար ընտրվել է ամենավատ ժամանակը: Վերջին շաբաթների մի շարք ռազմական հաջողություններից հետո Սիրիայի կառավարական զորքերը զարգացնում են հարձակումը Հոմսի վրա, որը վարչակարգի հակառակորդների հենակետերից մեկն է:
Ընդդիմադիրները Բաշար Ալ-Ասադի դեմ միավորվելու փոխարեն հարաբերություններ են պարզում իրար հետ:
Իսլամիստների հետ բախումներից հետո Սիրիական ազատ բանակի առաջնորդները դիմել են Արևմուտքի երկրներին՝ խնդրելով արագացնել զենքի խոստացված մատակարարումները: Նրանց կարծիքով՝ հակառակ դեպքում սիրիական դիմադրության աշխարհիկ ուժերը կթուլանան:
Այն մասին, որ սիրիական ընդդիմությունը պառակտված է, հաղորդվել էր դեռևս հուլիսի սկզբին: Այդ ժամանակ Սիրիայի ընդդիմադիր և հեղափոխական ուժերի ազգային կոալիցիան որոշեց Ահմեդ Ասի Ջաբրին ընտրել որպես նոր առաջնորդ:
