«Ձերբակալությունները քաղաքական հետապնդման արդյունք են, շարժումը գլխատելու միջոց»,- «Առաջին լրատվական»-ի հետ զրուցում նշեց երգահան Եղիշե Պոտրոսյանը, որի նկատմամբ քրեական հետապնդումը երեկ դադարեցվել է՝ նրա արարքում հանցակազմի բացակայության պատճառով: Երգահանին մեղադրում էին զանգվածային անկարգություններ կազմակերպելու համար։
Եղիշե Պետրոսյանի խոսքով՝ Սարի թաղում հուլիսի 29-ին ակնհայտ և պարզունակ սադրանք է եղել , ձերբակալվածներին և ոչ ոք սրացումների չի տարել: «Ինձ շատ լավ եմ զգում, որ այդ մարդկանց հետ կարողացել եմ ժողովրդին մոբիլիզացնել, ընդհարումից շեղել: Այդ օրը Սարի թաղ չկարողացա հասնել, վատացա, շտապ օգնության հսկողության տակ էի , բայց ակնհայտ է, որ ո՛չ Արմեն Մարտիրոսյանը, ո՛չ Դավիթ Սանասարյանը սրացումների չեն տարել»,- մանրամասնեց երգահանը։
Նրա խոսքով՝ իշխանություններն արդեն տանուլ են տվել, ջինը շշից դուրս է եկել, իսկ իշխանությունը չի շտապում հետևություն անել: «Կուզիկին գերեզմանն էլ չի փոխի, նույն կացնային ռուսական մոդելով են շարժվում»,- շեշտեց Եղիշե Պետրոսյանը։
Անդրադառնալով «Սասնա ծռերի» հանձնվելուն և առհասարակ գործողություններին՝ երգահանը նկատեց , որ ապշած ու հիացած է տղաների վեհանձնությունից. «Նրանք պայքարել են, որպեսզի իրենց երկիրը լինի այնպիսին, որ բոլորը ձգտեն այնտեղ ապրել: «Սասնա ծռերը» ցույց տվեցին մարդկային արժեքներ, սեր դեպի հայրենիքն ու ժողովուրդը»։
Եղիշե Պետրոսյանի խոսքով ՝ հասարակության առջև իշխանությունն ամբողջովին մերկացած է։
Լուսանկարը՝ Hetq.am-ի
