«Երբ որ կառույցից դուրս է գալիս բավական կայուն և տնտեսապես զարգացած երկիր, դա չի կարող չազդել կառույցի վրա՝ սկսած տնտեսական ազդեցությունից մինչև քաղաքական»,- «Առաջին լրատվական»- ի հետ զրույցում ասաց ԱԺ ՀՀԿ խմբակցության պատգամավոր, «Եվրոպական ինտեգրացիա» ՀԿ նախագահ Կարեն Բեքարյանը՝ անդրադառնալով հարցին, թե Մեծ Բրիտանիայի դուրս գալը ի՞նչ անդրադարձ կունենա Եվրամիության և ընդհանրապես այն երկրների վրա, ովքեր ցանկանում էին մուտք գործել ԵՄ:
Նրա դիտարկմամբ՝ բացի տնտեսական և քաղաքական ազդեցությունից՝ Մեծ Բրիտանիայի ԵՄ կազմից դուրս գալը կարող է դառնալ նախադեպ, որին կարող են հետևել նաև այլ երկրներ. «Երկրորդ էական հանգամանքն այն է, որ այս երևույթը կարող է տարածում ստանալ, և որքանո՞վ է եվրոպականության դիմադրողականությունը բավականացնելու, որ այս գործընթացը շղթայական չլինի, սա է հարցը: Ավելին, եթե անցնի 1-2 տարի, և Մեծ Բրիտանիան հաջողություններ ունենա և ցույց տա ավելի լավ արդյունքներ, ապա դուրս գալու մտադրություն ունեցող երկրների համար այս նախադեպը օրինակ կհանդիսանա: Մեծ Բրիտանիայի ԵՄ-ից դուրս գալն այս առումով մեծ մարտահրավեր է: Այն, որ սա ԵՄ համար շատ մեծ ազդակ էր՝ հասկանալու, պատկերացնելու, որ ամեն ինչ այնպես չի ընթանում, ինչպես ցանկալի կլիներ, դա միանշանակ է»:
Կարեն Բեքարյանի խոսքով՝ ԵՄ ներսում արձագանքների մեծ մասը շոկային է և ահռելի քանակով անելիք ունեն. այդ «ապահարզանն» այդքան հեշտ գործ չէ: ԵՄ անդամակցության ցանկություն ունեցող երկրների հետ բանակցությունները օրակարգում ավելի հետին պլան կմղվեն որոշ ժամանակ:
Մանրամասները՝ տեսանյութում:
