Այսօր մեկնարկեց «Խելացի լուծումներ` խելացի երկրների համար» խորագիրը կրող 6-րդ ամենամյա «ԴիջիԹեք Բիզնես» ֆորումը, որի պաշտոնական բացումն իրականացրեցին ՀՀ վարչապետ Տիգրան Սարգսյանը և Հայաստանում ԱՄՆ դեսպան Ջոն Հեֆերնը:
Տ․ Սարգսյանն իր ողջույնի խոսքում նշեց, որ այս տարիների ընթացքում մեծ աշխատանք է կատարվել մասնավոր հատվածի հետ, և եթե հիշենք, թե ինչպիսին էր վիճակը տեղեկատվական տեխնոլոգիաների բնագավառում 5 տարի առաջ և այսօր, ապա «ահռելի մեծ առաջընթաց» կա. «Դա առաջընթաց է ոչ միայն Հայաստանի Հանրապետությունում, այլև միջազգային համեմատությունների մեջ մենք կարողացել ենք նշել իրական առաջընթաց՝ տեղեկատվական տեխնոլոգիաների հասանելիության տեսանկյունից, դա մեզ չափազանց ուրախացնում և ոգևորում է»:
Շարունակելով իր միտքը՝ Տ. Սարգսյանը նշեց, որ քանի որ այս ոլորտը տարեկան 15-20 տոկոս աճ է ապահովում, ապա առաջին խնդիրը,որ իրենց առաջ դնում է մասնավոր հատվածը, դա այն է, որ մեր բուհերը կարողանան տարեկան առվազն 1000 մասնագետ մատակարարել․ «Սա մեր կադրային քաղաքականության տեսանկյունից առաջնահերթություններից մեկն է, և պլանավորելիս բուհերի ծավալային ընդլայնման խնդիրները՝ մենք առաջնահերթություն ենք տալիս հենց տեղեկատվական տեխնոլոգիաներին»:
Վարչապետը կարևորում է նաև շփումները մասնավոր հատվածի հետ։ «Չափազանց կարևոր է, որ մենք մշտապես ստանանք ազդակներ, թե ինչ հանգամանքեր կան, որոնք խոչընդոտում են բիզնեսի զարգացումը, և կառավարությունը ինչ նոր քայլեր պետք է ձեռնարկի, որպեսզի ավելի բարենպաստ պայմաններ լինեն: Մենք ուշադրությամբ հետևում ենք քննարկումերին, ձեր առաջարկությունները հնարավորություն են տալիս հստակեցնել մեր գործունեությունը տեղեկատվական տեխնոլոգիաների զարգացման գործում: Մենք պարտավոր ենք երաշխավորել և ապահովել ավելի բարձր աճի տեմպեր»,- ասաց նա:
Մանրամասները դիտեք տեսանյութում
