Կանադայի բնակիչները 32 մլն կանադական դոլար (25 մլն ԱՄՆ դոլար) են նվիրաբերել Սիրիային օգնություն ցուցաբերելու պետական հիմնադրամին՝ հայտնում է CBC հեռուստաալիքը։
Միջոցների հանգանակումն սկսվել է անցած աշնանը, երբ լիբերալ իշխանությունները հայտարարեցին, որ կանադացիները կկարողանան հավաքել 100 մլն դոլար (78 մլն ԱՄՆ դոլար): Այժմ Կանադայի կառավարությունը, CBC-ի տվյալներով, մտադիր է բյուջետային միջոցների հաշվին հիմնադրամ մուծել պակասող 68 մլն դոլարը:
Հավաքված բոլոր միջոցները կփոխանցվեն ՅՈՒՆԻՍԵՖ-ին և պետք է օգտագործվեն սիրիացի երեխաների կրթության ծախսերը հոգալու համար:
Ավելի վաղ Կանադայի ներգաղթի, փախստականների և քաղաքացիության հարցերի նախարար Ջոն Մակկալումը հայտնել էր, որ կանադացիները մասնավոր նվիրատվությունների հաշվին ֆինանսավորել են շուրջ 28 հազար սիրիացի փախստականների ժամանումը Կանադա և պատրաստ են մինչև 2016 թվականի վերջը վճարել մերձավորարևելյան այդ երկրից ևս առնվազն 10 հազար մարդու ժամանման համար։
