Երևանի ավագանու ընտրությունների նախընտրական քարոզարշավը մոտենում է ավարտին: Պարզելու համար, թե քաղաքական որ ուժն ինչպիսի քարոզարշավ անցկացրեց, «Առաջին լրատվական»-ը զրուցեց ՌԱՀՀԿ փորձագետ Էդգար Վարդանյանի հետ:
Վերջինիս կարծիքով՝ իշխանական կուսակցություններն ուղղակի ցանկանում են ընտրությունների արժեքն իջեցնել կենցաղային մակարդակի, որպեսզի ցույց տան, թե դրանք կարևոր չեն, իսկ ընդդիմադիր քաղաքական կուսակցությունները փորձում են ընտրություններին քաղաքական բովանդակություն տալ։ «Սա, իհարկե, հիմնավորված է, որովհետև վերջիվերջո քաղաքական կուսակցություններն են մասնակցում՝ Երևանի ավագանու ընտրություններին իրավունք ունեն մասնակցել հենց քաղաքական ուժերը, ուղղակի ընդդիմադիր ուժերի քարոզչությունն ընդհանուր իշխանափոխության կոնտեքստում է: Եվ դա հասկանալով՝ իշխանական կուսակցությունները փորձում են ընտրությունների նշանակությունը իջեցնել, որպեսզի ինչ-որ կերպ նաև խոչընդոտեն ընդդիմադիր քաղաքական ուժերի հաջողությանը: Փորձում են այնպիսի մթնոլորտ ստեղծել, որ ընդդիմադիր ընտրողները մեծ նշանակություն չտան այս ընտրություններին և ավելի պասիվ գտնվեն, չներգրավվեն այս ընտրական գործընթացին»,- նշեց նա:
Այն հարցին, թե քաղաքական ուժերն ավելի շատ սեփական քարոզչությո՞ւնը, թե՞ հակաքարոզչություն էին անում, փորձագետը պատասխանեց. «Կարելի է տարբեր բաներ ասել. օրինակ Հանրապետական կուսակցությունն անձնավորում է այս ընտրությունները, նրանց քարոզարշավը հիմնված է միայն Տարոն Մարգարյանի վրա՝ իհարկե, սա էլ է դիտավորյալ: Իսկ ընդդիմադիր ուժերի քարոզարշավներն էլ որքան էլ որ տարբերվեն, միևնույն է՝ նրանց համար սա լավ հնարավորություն է գործող ռեժիմին քննադատելու համար: Կոնկրետ Հայ ազգային կոնգրեսի մոտ ավելի մեծ տեղ է գրավում հակաքարոզչությունը, մի փոքր ավելի քիչ՝ «Բարև դաշինքի» և ԲՀԿ-ի մոտ»:
Ինչ վերաբերում է իշխանական ուժերին, ապա Էդգար Վարդանյանի գնահատմամբ՝ նրանց մոտ հակաքարոզչությունն ավելի քողարկված է. «Պատահական չէ, որ անընդհատ հայտարարում են՝ եկեք չքաղաքականացնենք այս ընտրությունները, սրանք քաղաքացիական ընտրություններ են: Նրանք ամեն ինչ անում են, որ ընդդիմադիր էլեկտորատի մոտ ընտրությունների գնալու ցանկություն չլինի, և դրա համար հակաքարոզչությունն ուղղակի չեն անում, որովհետև եթե ակնհայտ հակաքարոզչություն անեն, ապա կարող է իրենց համար հակառակ արդյունք ունենալ»։
