Երևանի քաղաքապետարանի ենթակայության թիվ 8 պոլիկլինիկայի թերապևտիկ բաժանմունքը քաղաքացիներին այսուհետ կսպասարկի նորոգված ու ավելի բարեկարգ հարկաբաժնում: Ինչպես տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, բաժանմունքի վերաբացման առիթով պոլիկլինիկա է այցելել Երևանի քաղաքապետի տեղակալ Դավիթ Օհանյանը: Քաղաքապետի տեղակալը քաղաքապետարանի ա ռողջապահության վարչության պետ Կամսար Բաբինյանի և պոլիկլինիկայի տնօրեն Արմինե Հարությունյանի ուղեկցությամբ շրջել է բաժանմունքի տարածքում, ծանոթացել նորոգումից հետո ստեղծված պայմաններին: Հարկաբաժնի զննասենյակները նաև նոր գույքով են համալրվել:
Շնորհավորելով պոլիկլինիկայի աշխատակազմին բաժանմունքի նորոգման առիթով՝ Երևանի քաղաքապետի տեղակալը նշել է, որ թիվ 8 պոլիկլինիկայի բուժանձնակազմը մայրաքաղաքում լավագույններից է ինչպես մասնագետների, այնպես էլ մատուցած ծառայությունների առումով և շնորհակալություն է հայտնել ներկաներին` բնակչությանը բարեխղճորեն և բարձրորակ սպասարկելու համար: Քաղաքապետի տեղակալը Երևանի քաղաքապետ Տարոն Մարգարյանի անունից վստահեցրել է, որ քաղաքապետարանի ենթակայության բուժհաստատությունները, այդ թվում և բնակչության սպասարկման առաջնային օղակ հանդիսացող պոլիկլինիկաները, այսուհետ ևս կլինեն քաղաքային իշխանությունների ուշադրության կենտրոնում:
«Երևանի քաղաքապետ Տարոն Մարգարյանի անունից վստահեցնում եմ, որ մեր բուժհաստատությունների նկատմամբ որդեգրած բարեփոխումների քաղաքականությունը շարունակական է լինելու: Տարեցտարի ավելի նորոգ, բարեկարգ շենքային պայմաններ ենք ունենալու` մասնագիտական տեսակետից առավել հագեցած ծառայություններով»,- նշել է Դավիթ Օհանյանը:
Թիվ 8 պոլիկլինիկայի տնօրեն Արմինե Հարությունյանը շնորհակալություն է հայտնել ոլորտի նկատմամբ քաղաքային իշխանությունների դսևորած ուշադրության և հոգատարության համար` վստահեցնելով, որ պոլիկլինիկայի անձնակազմն այսուհետ ևս կարդարացնի քաղաքացիների սպասելիքները`հավատարիմ մնալով բժշկի կոչմանն ու երդմանը: Տնօրենը հատկանշել է, որ 2011 թվականի համեմատությամբ 2015թ. առանձին ուղղություններով կրկնապատկվել են քաղաքացիների այցելությունները համաբուժարան, ինչը խոսում է բուժհաստատության նկատմամբ վստահության ավելացման մասին: Թիվ 8 պոլիկլինիկան 2014 թվականին վերազինվել է ժամանակակից ռենտգեն սարքավորմամբ, սոնոգրաֆիկ, ակնաբուժական հետազոտության և այլ սարքավորումներով:
