Երբ Հայաստանում ստեղծվում էր Սփյուռքի նախարարությունը, բոլորը միաբերան պնդում էին, որ այդպիսի նախարարության ստեղծման կարիք չկա, քանզի կա Արտաքին գործերի նախարարություն, որն ունի Սփյուռքի վարչություն, որը և զբաղվում է Սփյուռքի խնդիրներով: Այն ժամանակ կարծիք կար, որ նախագահ Սերժ Սարգսյանը խոստացել է Հրանուշ Հակոբյանին նախարարական պորտֆել տալ, և այլ նախարարական պաշտոն չգտնելով՝ որոշել է նոր նախարարություն ստեղծել հատուկ նրա համար: Բայց արտգործնախարար Էդվարդ Նալբանդյանը իր գործունեությամբ հասավ նրան, որ իր ղեկավարած կառույցը վերածվել է Սփյուռքի նախարարությանը կից մի վարչության, իսկ սփյուռքի նախարար Հրանուշ Հակոբյանը համատեղության կարգով նաև ԱԳ նախարար է:
Շաբաթներ առաջ ԱԺ-կառավարություն հարցուպատասխանի ժամանակ ՀՀԿ խմբակցության անդամ Տաճատ Վարդապետյանը հարց ուղղեց կառավարությանը, թե ինչ իրավիճակ է ստեղծվել Սիրիայում Ռուսաստանի կողմից իրականացվող ռազմական գործողությունների հետևանքով, և այն ինչ ազդեցություն է ունեցել սիրիահայերի վրա:
Թվում է, թե այս հարցին պետք է պատասխաներ Հայաստանի արտգործնախարար Էդվարդ Նալբանդյանը, և հայ պատգամավորներին ներկայացներ, թե տարածաշրջանում ինչ իրավիճակ է ստեղծվել Ռուսաստանի կողմից Սիրիայում իրականացվող ռազմական գործողությունների արդյունքում, լինելով Ռուսաստանի ռազմաքաղաքական դաշնակիցը՝ ինչպիսին է Հայաստանի վերաբերմունքը այդ գործողությունների նկատմամբ, ինչ զարգացումներ է Հայաստանը սպասում այդ միջամտության արդյունքում, և գուցե հույս հայտներ, որ այդ միջամտությունը կարող է ինչ-որ կերպ օգնել սիրիահայությանը առաջիկայում ավելի խաղաղ և անվտանգ կյանքի ակնկալիք ունենալ:
Բայց ի զարմանս բոլորի և ի հակադրություն պարզ տրամաբանության՝ այդ հարցին պատասխանեց սփյուռքի նախարար Հրանուշ Հակոբյանը, ով հայտարարեց, որ սիրիահայության վիճակը շարունակում է մնալ ծայրահեղ վատ, որ հայկական թաղամասերը հրետակոծվում են, ինչի արդյունքում միայն վերջին մեկ շաբաթվա ընթացքում կա չորս զոհ, այդ թվում՝ մայր և որդի, մի ծեր կին և 14 տարեկան մի աղջնակ, որ սիրիահայերին համայնքի պատասխանատուները քարոզում են, որ համայնքը լքելու դեպքում նրանք պետք է տեղափոխվեն Հայաստան, իսկ Շվեդիայում սիրիահայերը 1,5 տարվա ընթացքում կարողացել են եկեղեցի բացել, մի բան, որ չէր հաջողվում տեղի համայնքին տասնյակ տարիներ շարունակ: Մի խոսքով, միանգամայն ապաքաղաքական պատասխան:
Ի՞նչ կապ ունի տիկին Հակոբյանի պատասխանը Տաճատ Վարդապետյանի հարցի հետ, ո՞ւր մնացին այստեղ Ռուսաստանի կողմից իրականացվող գործողությունները, որ նրա հարցի հիմնական իմաստն էր: Բայց սփյուռքի նախարարը չէր կարող պատասխանել իր ոլորտին, իր իրավասությանը չվերաբերող հարցի, և նրանից ավելին չէր էլ կարելի սպասել: Վարդապետյանի հարցին պետք է պատասխաներ ԱԳ նախարար Էդվարդ Նալբանդյանը, բայց Նալբանդյանի ղեկավարած հաստատության վարքագծից կարելի է կարծել, որ այն վերածվել է Սփյուռքի նախարարության մի վարչության, կամ առնվազն Նալբանդյանը խնդիր է դրել ապացուցելու, որ իր ղեկավարած կառույցը ավելի լավ Սփյուռքի նախարարություն է, քան Հրանուշ Հակոբյանինը:
Ասվածի լավագույն վկայությունը ԱԳ նախարարության ֆեյսբուքյան էջն է, որի վերևի գրությունը՝ «ՀՀ Արտաքին գործերի նախարարություն», եթե չլինի, կարելի է կարծել, որ մտել ենք հենց Սփյուռքի նախարարության ֆեյսբուքյան էջ: Ինչ է ներկայացվում այդ ֆեյսբուքյան էջում: Ամենաթարմ օրինակը հոկտեմբերի 27-ի ամսաթվով դրված մամուլի հաղորդագրությունն է Լիբանանի Կուսլիկ քաղաքի Սուրբ Ոգու համալսարանում անցկացված «Հայաստանի օր» անունով միջոցառման մասին, որին ներկա է եղել այդ երկրում Հայաստանի դեսպան Աշոտ Քոչարյանը: Նշվում է, որ այս միջոցառման ժամանակ եղել են նաև երաժշտական կատարումներ, ասմունքի անհատ կատարողները բանաստեղծություններ են արտասանել, իսկ պարի խմբերը պարել են, և որպես ասվածի ակնհայտ ապացույց ներկայացված է պարախումբը պատկերող լուսանկարը:
Մյուս լուրն այն մասին է, որ հոկտեմբերի 23-ին Իտալիայում ՀՀ դեսպան Սարգիս Ղազարյանը աշխատանքային այցով եղել է Ռեջիո Էմիլիա քաղաքում, որտեղ ներկա է գտնվել գերմանացի գրող և իրավապաշտպան Արմին Վեգների Հայոց ցեղասպանության օրերին արված լուսանկարների ցուցահանդեսի պաշտոնական բացման արարողությանը: Այսպիսի՝ մշակութային և Սփյուռքի գաղթօջախների կյանքին առնչվող միջոցառումների մասին պատմող հաղորդագրություններ էջում բազմաթիվ են, բայց դժվար է գտնել որևէ տեղեկություն Հայաստանի վերաբերմունքը այս կամ այն, գոնե տարածաշրջանային նշանակության իրադարձության վերաբերյալ արտահայտելու մասին:
Լավ է, որ Հայաստանի դեսպանները ներկա են լինում Սփյուռքում տեղի ունեցող նման մշակութային, գիտակրթական միջոցառումների, բայց պետք է նկատի ունենալ, որ ԱԳ նախարարությունը առաջին հերթին քաղաքական կառույց է, որի հիմնական նպատակը աշխարհում կատարվող քաղաքական իրադարձությունների վերաբերյալ Հայաստանի դիրքորոշման ձևակերպումն ու ներկայացումն է: Եվ եթե Էդվարդ Նալբանդյանը չի պատասխանում պատգամավորի այն հարցին, թե ինչպես է Հայաստանը վերաբերվում Սիրիայում Ռուսաստանի իրականացվող ռազմական գործողություններին, ապա ավելի լավ կլինի, եթե ընդհանրապես այդ նախարարությունը դադարեցնի իր գործունեությունը, իսկ դեսպանատները լինեն Սփյուռքի նախարարությանը կից, ինչը նրանց չի զրկի զբաղվելու այն նույն աշխատանքով, ինչով նրանք զբաղված են եղել մինչև այսօր:
