Ռուսական Interfax լրատվական գործակալության փոխանցմամբ՝ ԱՄՆ-ը վերստին ճանաչվել է աշխարհի ամենաթանկ երկրային ապրանքանիշ՝ մեծ առավելությամբ առաջ անցնելով Չինաստանից։ Միևնույն ժամանակ Ռուսաստանն ու Ուկրաինան ընդգրկվել են վերջին մեկ տարում ամենավատ դինամիկա ունեցող երկրների թվում։
Այդ մասին նշված է Brand Finance ընկերության տարածած հայտարարության մեջ։ Ընկերությունն ԱՄՆ ապրանքանիշը գնահատել է 19.7 տրիլիոն դոլար։ Երկրորդ տեղում հայտնված Չինաստանը վերջին մեկ տարում կորցրել է իր արժեքի 1 տոկոսը և այժմ գնահատվում է 6.31 տրիլիոն դոլար։
Կանադայի ու Ավստրալիայի ապրանքանիշերը նվազել են, համապատասխանաբար, 8 և 10 տոկոսով, սակայն նրանք մնացել են լավագույն տասնյակում։ Առաջատար հնգյակում ընդգրկվել են նաև Գերմանիան՝ 4.17 տրիլիոն դոլար, Մեծ Բրիտանիան՝ 3.01 տրիլիոն դոլար և Ճապոնիան՝ 2.54 տրիլիոն դոլար։
Առաջատար տասնյակում ամենատպավորիչ առաջընթացն ունեցել է Հնդկաստանը՝ 32 տոկոս, որն այժմ իր 2.14 տրիլիոն դոլար ցուցանիշով զբաղեցնում է 7-րդ հորիզոնականը։ Բրազիլիան 17 տոկոսի նահանջի պատճառով դուրս է մնացել լավագույն տասնյակից և զբաղեցնում է 11-րդ տեղը։ Ռուսաստանն «էժանացել» է 31 տոկոսով՝ մինչև 810 միլիարդի, և այժմ զբաղեցնում է միայն 18-րդ տեղը։ Նախորդ տարի նա 12-րդն էր։
