Փախստականների վարքը, որոնք ժամանում են Գերմանիա, վերջին ամիսներին զգալիորեն վատացել է և լուրջ գլխացավանք է պատճառում տեղի սոցիալական մարմիններին: Այս մասին ZDF հեռուստաալիքի եթերում հայտարարել է Գերմանիայի ՆԳՆ ղեկավար Թոմաս դե Մեզյերը:
Այդպիսով նա առաջին անգամ քննադատել է եկվորների վերաբերմունքը տեղի օրենքների և վարչական հաստատությունների աշխատանքի նկատմամբ:
«Դեռևս ամռան սկսվելուց առաջ փախստականները շնորհակալ էին, որ իրենք այստեղ են,- ասել է նա:- Իսկ հիմա շատ փախստականներ կարծում են, որ իրենք ինքնուրույն կարող են գնալ ուր ուզեն: Նրանք լքում են վարչական հաստատությունները, տաքսի են պատվիրում և, ի զարմանս ինձ, փող ունեն Գերմանիայով հարյուրավոր կիլոմետրեր անցնելու համար»:
«Նրանք գործադուլներ են անում, որովհետև նրանց դուր չեն գալիս կացարանները, նրանց դուր չի գալիս սնունդը, նրանք ծեծկռտուքներ են սարքում: Այդպիսիները փոքրամասնություն են, բայց մենք պետք է պարզ ասենք, որ մենք եկվորներից կիրթ վերաբերմունք ենք պահանջում»,- հայտարարել է դե Մեզյերը:
Միաժամանակ, Գերմանիայի շարքային քաղաքացիները ևս սկսել են ավելի վատ վերաբերվել միգրանտներին: Շարունակում է աճել միգրանտների համար կենտրոնների վրա հարձակումների թիվը: Ընթացիկ տարվա սկզբից մինչև սեպտեմբերի 21-ի դրությամբ ոստիկանությունը Գերմանիայում արձանագրել է 437 այդպիսի դեպք:
