Ժողովրդին իշխանություն չեն հանձնում, ժողովրդի իշխանությունը վերցնում են: «Առաջին լրատվական»-ի հետ զրույցում այս մասին ասաց «Նոր ժամանակներ» կուսակցության առաջնորդ Արամ Կարապետյանն՝ անդրադառնալով երեկ նախագահական նստավայրում ՀՀ նախագահ Սերժ Սարգսյանի տված ասուլիսի մի քանի ուշագրավ հատվածներին:
Խոսելով Սերժ Սարգսյանի այն դիտարկման մասին, թե Րաֆֆի Հովհաննիսյանին առաջարկել է պատրաստվել Երևանի ավագանու ընտրություններին՝ Ա. Կարապետյանը կատակեց՝ ասելով, որ եթե Սերժ Սարգսյանը հավատում է, որ Հայաստանում ընտրություն է կատարվում, ուրեմն կարելի է գնալ Երևանի ավագանու ընտրություններին: Նրա կարծիքով՝ Սերժ Սարգսյանից սկսած բոլորը գիտեն, որ Հայաստանում ընտրություն չի կատարվում:
«Ե՛վ Սերժ Սարգսյանին, և՛ Րաֆֆի Հովհաննիսյանին խորհուրդ կտայի ավելի լուրջ վերաբերվել երկրում ստեղծված իրավիճակին, հայ ազգի ապագային: Լրջություն մտցնել այդ ամենի մեջ: Ի՞նչ է նշանակում գնալ Երևանի ավագանու ընտրություններին: Նախագահականն արդեն հորով-մորով արեցի՞ն, հիմա էլ գնում են ավագանու ընտրությունների՞: Դա նորընտիր նախագահի մամլո ասուլիս չէր»,- տեսակետ հայտնեց Արամ Կարապետյանը: Նա նաև նշեց, որ քաղաքական առումով Րաֆֆի Հովհաննիսյանին մինչև հիմա չի հասկանում:
«Իմ պատրաստվածությունը երևի չհերիքի մինչև վերջ հասկանալու: Օրինակ՝ մենք բոլորս չենք հասկանում, թե ինչ է նշանակում «իշխանությունը պետք է հանձնել ժողովրդին»։ Նստել են՝ կերդվի, չի երդվի, ժողովրդին կհանձնի, ժողովրդին չի հանձնի: Հայաստանի ժողովրդին ո՞վ է ինչ հանձնել երբևէ, բացի թալանելուց, որ Սերժ Սարգսյանն իշխանություն հանձնի: Ուստի ժողովրդին իշխանություն չեն հանձնում, ժողովրդի իշխանությունը վերցնում են»,- ասաց Արամ Կարապետյանը:
Անդրադառնալով արտաքին քաղաքականության մասին Սերժ Սարգսյանի դիտարկումներին՝ մեր զրուցակիցն ասաց, որ Հայաստանի արտաքին քաղաքական մարտահրավերը պատերազմից խուսափելն է, շրջապատում գնացող պրոցեսներից խուսափելն ու Հայաստանը մեկուսացումից դուրս բերելը: «Իսկ ՀՀ թիվ մեկ խնդիրը՝ տնտեսական լրիվ նոր քաղաքականություն մշակելն ու անցկացնելը: Հայաստանի համար օրակարգային խնդիրը որպես պետականություն մնալն է, գեոքաղաքական առումով Հայաստանն այլևս գոյություն չունի»,- նկատեց Արամ Կարապետյանը:
Հիշեցնենք, որ երեկ նախագահական նստավայրում մի քանի լրագրողների հետ հանդիպման ժամանակ Սերժ Սարգսյանն անդրադարձել էր ինչպես ներքաղաքական, այնպես էլ արտաքին քաղաքական մի շարք հարցերի: Նա հստակեցրել էր, որ Ազատության հրապարակում Րաֆֆի Հովհաննիսյանին չի այցելելու, բացահայտել էր, թե ինչ են խոսել նախագահական նստավայրում իրենց հանդիպման ժամանակ, տեղեկացրել էր՝ ինչ առաջարկներ է ներկայացրել Րաֆֆի Հովհաննիսյանին: Սերժ Սարգսյանը նաև ասել էր, որ սխալ են այն կարծիքները, թե ՌԴ-ն Հայաստանին պարտադրում է անդամակցել Մաքսային միությանը:
