Քրեագետ Սերգեյ Գալոյանի փոխանցմամբ՝ այժմ քրեական աշխարհը գտնվում է համեմատաբար հանգիստ վիճակում, սակայն առաջիկայում նոր զարգացումներ անպայման կլինեն: «Առաջին լրատվական»-ի հետ զրույցում նա ասաց, որ քրեական աշխարհում Դեդ Հասանի իրավահաջորդի շրջանառվող հարցն իր լուծումը կստանա այն ժամանակ, երբ Շաքրո Մլադշին Իսպանիայում պատիժը կրելուց հետո ազատ արձակվի. «Քրեական աշխարհը սպասում է Շաքրո Մլադշիի վերադարձին: Իմ կարծիքով՝ հենց նա էլ կդառնա Դեդ Հասանի իրավահաջորդը»:
Նա ասաց, որ Շաքրո Մլադշիին քրեական աշխարհի պարագլուխ են ընտրել Դեդ Հասանի մտերիմները՝ ընտրության խաղադրույքը կատարելով նրա օգտին:
59-ամյա Շաքրոն ծնվել է Թբիլիսիում և Դեդ Հասանի պես ազգությամբ եզդի է: Նա լավ հայտնի է ինչպես Ռուսաստանում, այնպես էլ դրա սահմաններից դուրս։ ԱՄՆ-ում նա ընդգրկված է «Եղբայրություն» խմբավորման մեջ:
Շաքրոյի պատժաժամկետն ավարտվում է մարտին, երբ կբոլորի նրա 60 տարին: Իսպանական դատարանի վճռով՝ նրան երկրից արտաքսելու են, և Շաքրոն 10 տարի իրավունք չունի վերադառնալ Իսպանիա:
Նշենք նաև, որ Շաքրո Մլադշիի դեմ մի քանի անգամ մահափորձ է կազմակերպվել։
Նա Իսպանիա է տեղափոխվել է 1999 թվականին և հանգրվանել է Կոստա դել Սոլ առողջարանում: 2005 թ. Իսպանիայում «Բոռ» գործողության ժամանակ Շաքրոյի շատ մտերիմներ ձերբակալվել էին, իսկ նա փախել էր Արաբական Էմիրություններ։ Այնտեղ նրան ձերբակալել և հետ էին ուղարկել Իսպանիա, որտեղ նա դատապարտվել էր 7,5 տարվա ազատազրկման: Շաքրոն հեռակա դատապարտված է նաև Վրաստանում՝ մի գործարարի առևանգման մեղադրանքով:
