Sputnik-Georgia լրատվական գործակալության փոխանցմամբ՝ Ռուսաստանի բարձրաստիճան անձինք պատրաստ են ժամանել Վրաստան և հանդիպել իրենց վրացի գործընկերների հետ։ Այս մասին հայտարարել է Վրաստանի խորհրդարանի նախկին նախագահ, «Դեմոկրատական շարժում» կուսակցության առաջնորդ Նինո Բուրջանաձեն, ով հուլիսի 10-11-ին Մոսկվայում հանդիպել է ՌԴ ԱԳՆ-ի ու Պետդումայի ղեկավարության հետ։
«Ռուսական կողմի հետ իմ հանդիպումներում հայտարարվել է, որ ռուսական կողմի բարձրաստիճան պաշտոնատար անձինք պատրաստ են ժամանել Վրաստան, հանդիպել իրենց գործընկերների հետ, այսինքն՝ այն անձանց, ովքեր իրենց կարգի ներկայացուցիչներ են։ Ռուսական կողմը ծայրահեղ դեպքում պատրաստ է բանակցություններն անցկացնել չեզոք տարածքում, որպեսզի ռուս-վրացական հարաբերությունները դուրս բերի փակուղուց»,- նշել է Բուրջանաձեն։
Բուրջանաձեի խոսքով՝ Վրաստանի ու Ռուսաստանի միջև ուղիղ երկխոսությունն անհրաժեշտ է, որպեսզի Ցխինվալի շրջանի (Հարավային Օսիա) սահմանն այլևս չխորանա դեպի երկրի խորք. «Եթե իշխանությունը չձեռնարկի կոնկրետ քայլեր, և երկխոսություն չսկսեն Ռուսաստանի հետ, ապա սահմանների փոփոխումն անպայմանորեն կշարունակվի»։
