Ադրբեջանական Anspress.com կայքի փոխանցմամբ, ամերիկաբնակ ադրբեջանցիները ԱՄՆ նախագահ Բարաք Օբամային կոչ են արել իր ապրիլքսանչորսյան ելույթում չգործածել «Ցեղասպանություն» եզրույթը:
Բացի այդ, ադրբեջանցիները պատրաստվում են հակահայկական ու հակաքրդական միջոցառումներ իրականացնել: Նրանց հայտնի է դարձել, որ ապրիլի 19-ին Քրդստանի աշխատավորական կուսակցության (PKK) համակիրները, իսկ ապրիլի 24-ին՝ «արմատական հայացքների տեր» հայերը պլանավորել են բողոքի ակցիաներ անցկացնել Վաշինգտնում գտնվող Թուրքիայի դեսպանատան առջև:
ԱՄՆ-ի ադրբեջանական համայնքից պահանջվում է կանխել այդ ակցիաները` դրանով իսկ օգնելով ամերիկաբնակ թուրքերին. «Մենք մեր բոլոր համակիրներին կոչ ենք անում հավաքվել Թուրքիայի դեսպանատան առջև և դրանով իսկ ընդգծել թուրքերի հետ մեր համերաշխությունը»:
Հիշեցնենք, որ Ամերիկայում թուրքական միությունների դաշինքի (TADF) նախագահ Քայա Բոզթեփեի տվյալներով` այնտեղ բնակվում է շուրջ 500.000 թուրք: Բացի այդ, կան նաև 2 միլիոն թյուրքեր` ադրբեջանցիներ, թուրքմեններ, ուզբեկներ և այլն:
Եվ ահա, թուրքական կողմը մտադիր է 2.5 միլիոնանոց այդ զանգվածը վերածել առավել համախմբված ու կազմակերպված ուժի:
