ԱՄՆ-ը չի պատրաստվում Ռուսաստանից թշնամի սարքել և չի ձգտում նրա հետ որևէ հակամարտության։ Այս մասին Բեռլինում հայտարարել է ԱՄՆ պաշտպանության նախարար Էշթոն Քարթերը՝ փոխանցում է TASS գործակալությունը։
«Մենք չենք ձգտում սառը պատերազմի, էլ չասած՝ Ռուսաստանի հետ թեժ պատերազմի մասին։ Մենք չենք փորձում Ռուսաստանից թշնամի սարքել։ Բայց մի՛ շփոթեք. մենք կպաշտպանենք մեր դաշնակիցներին, աշխարհակարգը՝ հիմնված օրենքի գերակայության և այն դրական ապագայի վրա, որն այն (աշխարհակարգը) մեզ երաշխավորում է»,- ասել է Պենտագոնի ղեկավարը։
Քարթերն այս շաբաթ շրջագայում է Եվրոպայով։ Գերմանիայից հետո նա կայցելի Էստոնիա և կմասնակցի ՆԱՏՕ-ի գործընկերների հետ հանդիպմանը, որը տեղի կունենա Բրյուսելում հունիսի 24-25-ը։ Նրա խոսքով՝ այդ հանդիպմանը կքննարկվի անվտանգության ոլորտում նոր պայմաններին դաշինքի հարմարվելու անհրաժեշտությունը՝ կապված Ուկրաինայի իրադարձությունների և Ռուսաստանի հետ հարաբերությունների սրման հետ։
