Վրաստանի արդարադատության նախկին նախարար Զուրաբ Ադեիշվիլին խոստանում է անպայման վերադառնալ Վրաստան: Այս մասին հայտնում է «Գրուզիա Օնլայն»-ը:
«Չեմ պատկերացնում, որ երբեք չեմ վերադառնա Վրաստան: Անպայման կվերադառնամ: Սպասում եմ այն ժամանակին, երբ հնարավորություն կունենամ վերադառնալու իմ երկիր: Ինչ վերաբերում է իմ քաղաքական գործունեությանը՝ ես այն ժամանակ էլ, երբ քաղաքականության մեջ էի, ոչ մի օր չէի մտածում, որ քաղաքականության մեջ երկար կլինեմ»,- ասել է Ադեիշվիլին:
Նրա խոսքով՝ ինքը շատ անգամ է քաղաքականությունից հեռանալու որոշում ընդունել, բայց չի ստացվել իրագործել:
«Մարդուն չի կարելի երկար ժամանակ պաշտոն վարել՝ հատկապես նրան, ով բարձր ղեկավար պաշտոն ունի: Ես շատ եմ սիրում իմ մասնագիտությունը և մտադիր էի Վրաստանում կամ արտասահմանում շարունակել աշխատանքս իմ մասնագիտությամբ»,- նշել է Ադեիշվիլին:
Նրա խոսքով՝ դա չի եղել, քանի որ այդ ամբողջ ընթացքում իր և իր ընկերների համար պատուհան չի եղել, որպեսզի այդպիսի որոշումը չընկալվեր որպես փախուստ թիմից կամ բարդ խնդիրներից խուսափելու փորձ:
«Ես շատ շնորհակալ եմ թիմին, որն ինձ հնարավորություն է տվել մասնակցելու երկրի վերափոխմանը: Մենք շատ սխալներ ենք թույլ տվել, բայց եղել են շատ ճիշտ որոշումներ և հաջողություններ»,- ասել է Ադեիշվիլին:
