Մինչ սելֆիները կդառնային մեր կյանքի առօրյա մասը, Ալյասկայի այս բնակիչը արդեն սկսել էր իրեն ամեն օր նկարել, հայտնում է odditycentral.com-ը: Այժմ՝ 16 տարի անց, իր դեմքի 5840 լուսանկարից Ջոնաթան Քելերը թողարկել է յուրօրինակ թայմ-լապս տեսահոլովակ: Երեք և կես րոպեանոց հոլովակը ցույց է տալիս 22 տարեկան երիտասարդի փոխակերպումը ներկայիս 39 տղամարդուն:
Քելերը 1998 թ. հոկտեմբերի 1-ից սկսած իր նախագիծը վերնագրել է «Ավելի արագ ապրելով իմ կյանքը»: Այդ ժամանակվանից սկսած՝ նա ամեն օր լուսանկարել է իր առանց արտահայտության դեմքը:
Հետաքրքրական է, որ Քելերն ասում է, որ ինքը նախագիծը սկսել էր պարզապես ընկերուհուն իր տեսակետը ապացուցելու համար: Երբ գնում է Nikon CoolPix 900 թվային տեսախցիկը, ընկերուհին հարցնում է, թե ինչո՞ւ է գնել և դրանով ի՞նչ է անելու: Նա իր մտադրությունը հայտնում է ընկերուհուն, ծաղրի է արժանանում, որն էլ դրդում է Ջոնաթանին իրականացնել իր մտադրությունը:
Չնայած նա թողարկել է այդ հոլովակը, Քելերն ասում է, որ նախապատրաստվում է շարունակել իր ամենօրյա սելֆիները մինչև իր կյանքի վերջը: «Միայն այդ ժամանակ այն կդառնա ամբողջական և կունենա արժեք: Հուսով եմ՝ այդ օրը շատ հեռու է, բայց դու երբեք չես կարող իմանալ, ճի՞շտ է»:
