«Արևելյան գործընկերության» Ռիգայի գագաթնաժողովի մասնակիցները հաստատում են ղարաբաղյան հակամարտության խաղաղ կարգավորման գործում ԵԱՀԿ Մինսկի խմբի միջնորդների ջանքերին աջակցելը, այդ թվում՝ նախագահների և 2009թ. նրանց հայտարարությունների մակարդակով։ Այս մասին ասված է մայիսի 21-22-ը Ռիգայում «Արևելյան գործընկերության» գագաթնաժողովում ընդունված հռչակագրում։ Համատեղ հռչակագրում մասնավորապես ասվում է հետևյալը. «Ռիգայի գագաթնաժողովի մասնակիցները հաստատում են այն կարևորությունը, որը ունի «Արևելյան գործընկերությունը» ՝ որպես Եվրոպական հարևանության քաղաքականության կոնկրետ չափում։ Նրանք ևս մեկ անգամ հաստատում են այդ ռազմավարական և հավակնոտ գործընկերության տեսլականը՝ որպես փոխադարձ շահերի, պարտավորությունների և Արևելյան Եվրոպայի գործընկեր երկրներում բարեփոխումների կայուն գործընթացները պաշտպանող նախագիծ։ Գագաթնաժողովի մասնակիցները հաստատում են ժողովրդավարությանը, օրենքի գերակայությանը, մարդու իրավունքներին և հիմնական ազատություններին հավատարիմ մնալու իրենց որոշումը։ Նրանք հասկանում են, որ «Արևելյան գործընկերությունը» հիմնված է ընդհանուր տնօրինության, պատասխանատվության, տարբերակման և փոխադարձ հաշվետվության վրա»։
Հաջորդիվ փաստաթղթում ասվում է, որ Եվրոպական հարևանության քաղաքականության և «Արևելյան գործընկերության» գագաթնաժողովի մասնակիցները հաստատում են յուրաքանչյուր անդամի սուվերեն իրավունքը՝ ինքնուրույն ընտրել ամբիցիաները և նպատակները, որոնց նրանք ձգտում են ԵՄ-ի հետ իրենց հարաբերություններում։ «ԵՄ-ն և նրա սուվերեն գործընկերները իրենք պետք է որոշում կայացնեն, թե ինչպես պետք է շարունակեն իրենց հարաբերությունները»,- նշվում է փաստաթղթում։
Հայաստանի մասով հռչակագրում ասվում է. «Գագաթնաժողովի մասնակիցները ողջունում են 2013թ. Վիլնյուսի գագաթնաժողովից հետո ԵՄ-ի և նրա գործընկերներից յուրաքանչյուրի միջև տարբերակված երկկողմ հարաբերությունների զարգացման համար ընդունած քայլերը։ Մասնակիցները ողջունում են ԵՄ-ի և Հայաստանի միջև ապագա համաձայնության համար շրջանակների ընդհանուր ըմբռնումը, որն ուղղված է փոխադարձ հետաքրքրություն ներկայացնող բոլոր ոլորտներում նրանց համակողմանի համագործակցությանը և հետագա ամրապնդմանը»։
Հռչակագրում նշվում է, որ գագաթնաժողովի մասնակիցները ողջունում են կայուն համայնքային զարգացման նոր առաջատար նախաձեռնությունը և անհամբերությամբ սպասում են դրա իրականացմանը։ «Այս ենթատեքստում նրանք ընդգծում են E5P կարևոր դերը և Հայաստանի, Վրաստանի, Մոլդովայի Հանրապետության ու Ուկրաինայի դեպքում E5P-ի ընդլայնման գործում ձեռք բերած առաջընթացը։
Բացի այդ, գագաթնաժողովի մասնակիցները ողջունում են Հայաստանի և Ադրբեջանի հետ վիզային ռեժիմի մեղմացման և ռեադմիսիայի համաձայնության իրականացումը։ Նրանք անհամբերությամբ սպասում են սահմանված կարգով Հայաստանի հետ վիզային երկխոսության բացման հարցի քննարկմանը՝ պայմանով, որ Հայաստանը կշարունակի կայուն առաջընթաց ապահովել վիզային ռեժիմի մեղմացման և ռեադմիսիայի համաձայնագրի ամբողջական իրականացման հարցում»,- ասված է հռչակագրում։
Փաստաթղթում նաև նշվում է,որ գագաթնաժողովի մասնակիցները ողջունում են Horizon – 2020 նորարարական հետազոտությունների հարցով շրջանակային ծրագրին Մոլդովայի և Ուկրաինայի անդամակցությունը և անհամբեր սպասում են Հայաստանի և Վրաստանի միանալուն։
Մասնակիցները ողջունում են փոքր և միջին ձեռներեցության հաստատությունների մրցունակության ԵՄ ծրագրին Մոլդովայի մասնակցությունը և սպասում են ապագայում Ուկրաինայի և Հայաստանի անդամակցությանը։ Բացի այդ նրանք անհամբերությամբ սպասում են առաջին իսկ հնարավորության դեպքում ԵՄ-Հայաստան համաձայնության շուրջ բանակցությունների մեկնարկին։
